Daxmeh gou saedcaih daih gyaez yawj soujgih lo, mboujlwnh seizlawz ndaw fwngz cungj dawz soujgih.

Ngoenzde, daxmeh youq fuengz- dajcawj cien gyaeqgaeq, de dawz gyaeq- gaeq cuengq roengz rek bae, couh dawz soujgih hainduj yawj. Gvaq yaep ndeu, gou mup daengz raq heiqremj haenq ndeu. Gou ganjgip buet haeuj fuengz- dajcawj bae, baez yawj, gyaeqgaeq cungj cien ndaem lo, hoeng daxmeh lij yinxdaeuz yawj dwk densigi ndaw souj- gih, di ndeu cungj mbouj haeujsim gyaeqgaeq ndaw rek. Dingqnyi gou heuh de, daxmeh cij fwt singj gvaqdaeuj. Lij miz baez ndeu, daxmeh bae diengzhaex, hoeng gvaq le haujlai nanz lij mbouj raen okdaeuj. Dahraix, caeuq gou guj haenx ityiengh, de cingq youq ndaw diengzhaex haeujsim sisi yawj soujgih ne. Ai, meh gou ha!

Yawjraen daxmeh yienghneix, gou sim siengj: Cungj yawj soujgih haih lwgda, hix gemjnoix seizgan caeuq vunz ndaw ranz gangjgoj. Ndigah, gou yaek bang daxmeh gaij gij sibgvenq yaez yinx yawj soujgih de bae.

Gou cinjbi cazyawj daxmeh youq seizlawz yawj soujgih, baezlaeng youq de yawj soujgih gaxgonq couh dawz soujgih yo hwnjdaeuj. Hoeng gou raen, daxmeh ca mbouj geijlai moix faen moix miux cungj dwg yawj soujgih, ndigah gaenbonj mbouj miz gihvei yo soujgih. Gou mbouj ndaej yienghneix couh mbouj guh bw, ndaej dauq naemj aen banhfap moq ndeu cij ndaej. Gou ngeix sam naemj seiq, doeklaeng siengj ok aen banhfap ndei ndeu, couh dwg mwh daxmeh yaek yawj soujgih, gou couh sikhaek gvaqbae laengz de. Deng, couh baenzneix guh!

Mwh daxmeh gwn haeux yawj soujgih, gou couh dawz soujgih de bae, caeuq de gangj gij saeh fatseng youq hagdangz haenx. Mwh daxmeh bae diengzhaex daiq soujgih, gou couh aeu soujgih de bae, guh gij yinwu youq gwnz soujgih doegsaw lauxsae buci haenx……

Ginggvaq gou mbouj cuengqsoeng bae guh, daxmeh menhmenh gemjnoix seizgan yawj soujgih lo. Gvaq duenh seizgan he, daxmeh caiq mbouj lumj doenghbaez nei seizseiz cungj yawj soujgih lo, gwn haeux le lij cawjdoengh ra daxboh gangjgoj, ok rog bae byaijbyaij. Gou yawj youq ndaw da, angq youq ndawsim, gaej naeuz miz geijlai angq lo!

(Sanjsih Swngj Baujgih Si Lungzyen Sihdagaih Siujyoz ngeih nienzgaep Liuz Fanzyij)