Ngoenzneix ndit ronghsagsag, rumzcin raeujrub lumh aen naj dou, dou seiqlengq ra rizdin seizcin.

Dou daeujdaengz gunghyenz, ndaw gunghyenz goliux、gomaenj、goleiz、godauz…… cungj did ngaz hai va lo. Miz saek oiq miz saek geq, gak cungj gak yiengh……

Dou daeujdaengz ndaw doenghnaz, ndaw doenghnaz mbin daeuj baenz raq baenz raq feihnamh cingrang, go’nywj did ok ngaz oiqet, geizheih dwk yawj aen biengz neix. Bohlungz nungzminz ndaem go’byaek heuyauyau, vaduhlanhdouq、vaduhbap hai va lo, miz saekgyaemq、saekhau, lij miz saekmaeq. Vaduhlanhdouq lumj gyoengq mbungqmbaj iq nei diuqfoux, song limq vaduhbap lumj doiq da hung ndeu, miz saenz dwk cazyawj aen biengz neix. Mupmup vacwx heuh mbouj ok coh neix, va de henjrwg, feih de youh diemz youh singjsien.

Dou daeujdaengz henz dah iq, gyoengq lwgnyez cuengq dwk yiuhrumz, vaiqvued buet dwk hemq dwk, yiuhrumz mbin hwnj gwnzmbwn sangvid bae.

Ha! Dou ra daengz seizcin lo. Seizcin laxlawz youq ndaw doenghnaz, youq ndaw lwgda gyoengq lwgnyez.

(ngeih nienzgaep Danz Siuhyungj)