Youq gwnz dingj bo he, maj miz go faex iq ndeu, de moix ngoenz gyanghaet cungj youq ndaw sing roeg hemq ndiu daeuj. Byaengq aen da, yawj roeg iq youq gyangmbwn cwxcaih mbin bae mbin dauq, de hozhaenz dangqmaz. De hix siengj lumj roeg iq nei mbin ndaej, yienghde couh ndaej bae yawjyawj aen seiqgyaiq rog bo lo.

Ngoenz ndeu gyanghaemh, de loq aen loq raezrangh ndeu……

“Gwnz ndang humz lai lo! Baenzlawz yienghneix ha?” Go faex iq ngaem gyaeuj yawj, raen gwnz ndang swhgeij maj ok doiq fwed hung ndeu. Faex iq angqvauvau hemq naeuz: “Nyienhmuengh gou saedyienh lo! Gou seizneix ndaej siengj mbin daengz gizlawz couh mbin daengz gizde bae lo!” Gangj dwk, de couh vad song gaiq fwed de, yungh rengz baez beng, couh aeu swhgeij lienz rag beng hwnjdaeuj lo. Faex iq caj mbouj gib dwk mbin coh giz youh gyae youh sang bae. De ngaem gyaeuj yawjyawj bya sang dah raemx gyaeundei, ngiengx gyaeuj yawjyawj duj fwj riengz rumz mbinfifi henz ndang, ndawsim gikdoengh raixcaix. Mbin nanz le, faex iq rox- nyinh miz di baeg lo. De couh mbin daengz gwnz duj fwj mbouj hung hix mbouj iq bae, dawz rag cab haeuj ndaw fwj bae, yaep ndeu couh ninzndaek lo.

Raq sing gunglunglung he cauz ndiu faex iq, de yawjraen gyaq feihgih “iqet” ndeu cingq mbin coh de. Faex iq miz di yawj mbouj hwnj gyaq feihgih neix, riu dwk naeuz: “Mwngz gyaq feihgih iq neix, gou yaek caeuq mwngz beijbeij byawz mbin ndaej vaiq!” Faex iq couh caj feihgih daeujdaengz. Hoeng de raen feihgih yied daeuj yied hung、yied daeuj yied hung, caj feihgih daeujdaengz baihnaj faex iq, gaenq dwg ndaek ngauq hungloet ndeu lo. Feihgih dangj lwgda faex iq, yaepyet youh “fwt” mbin gvaqbae lo. Faex iq deng feihgih daiq daeuj gij heiq haenx ci bae haemq gyae cij dingz roengzdaeuj, mwh de moengzloengz mangxlangx, raq rumz- geujgaeq hung ndeu cingq geuj coh de. Mwh de raen le gaenq ndoj mbouj gib lo. Rumzgeujgaeq dawz de geuj hwnj gwnzmbwn sang’vidvid bae, fwed faex iq deng rumzgeujgaeq geuj raek lo. Faex iq lau dwk saenzdedded, hemq naeuz:“Byawz daeuj gouqgouq gou! Byawz daeuj gouqgouq gou!” Hoeng youq ndaw raq rumzhaenq neix, byawz dingqnyi sing gouz gouq iqet neix ne?

Rumzgeujgaeq dingz lo, faex iq daj giz sang doek roengzdaeuj, cungj cigsoh doek roengzdaeuj haenx, fwt sawj faex iq doeksaet ndiu gvaqdaeuj. Gwnz gyaeuj de cungj dwg naed hanh hunghwd. De uet hanh bae, danqheiq naeuz:“Ai, lij ndei cij dwg loq. Yienznaeuz gwnzmbwn ndei guh- caemz, hoeng gou lij dwg gyaez cungj dabsaed gwnz daihdeih neix.” Mbouj- gvaq baez loq mauhyiemj neix, sawj faex iq ciuh ndeu nanzlumz.

(Suhcouh Si Gauhsinh Gih Cwngzda Sizyen Siujyoz Hanz Mozhih)