Vahsug gangj ndaej ndei, “gwnz daiz sam faen cung, laj daiz cib bi goeng”. Vihliux youq ndaw gietsai doxdax habciengq ndaej cingzcik ndei, ban dou baizlienh baez youh baez, mboujlwnh bongj rumz roxnaeuz doek fwn, cungj yawjraen gyoengqdou, aenvih dou itcig saenq: Cijaeu yunghsim bae guh couh itdingh guh ndaej hingz!

Baez yaep da, ndwen ndeu gvaqbae lo, gietsai doxdax habciengq cungjsuenq hainduj lo!

Ngoenzde banringz, lauxsae daiq dou bae dijyigvanj doxdax. Dou bonjlaiz bouxboux saenqsim cibcuk, nyinhnaeuz itdingh aeu ndaej “daegdaengjciengj”, hoeng gvaq yaep ndeu, dou cix mbouj yienghneix nyinhnaeuz lo. Dou dwg baiz daih cibsam hwnj daiz biujyienj, yawj sat baihnaj cib aen ban habciengq le, dou miz di doeknaiq lo: Gizneix bouxak lai dangqmaz, seizbienh ra ban ndeu lumjbaenz cungj ciengq ndaej beij dou ndei, neix sawj dou atlig gig hung. Doengzseiz, bouxcijveih atlig beij dou lij hung, aenvih mingh ban dou couh gaem youq ndaw fwngz de, danghnaeuz de guh loek lo, ban dou couh saw lo.

Mwhde, lauxsae coenz vah ndeu, hawj dou youh yawjraen di maqmuengh ndeu—— “Gyoengq doengzhag, cijaeu caenhrengz bae guh, mbouj miz maz guh mbouj daengz bw!”

Mbouj geij nanz, daengz dou hwnj daiz lo, gyoengq doengzhag ndawsim gig gaenjcieng, hwnj daiz gonq daihgya dox gujli. Caj youq gwnz daiz ndwn ndei hai bak ciengq, dou di ndeu cungj mbouj gaenjcieng lo. Gou yawj gyoengq bingzveij, gyoengqde lumj cungj caem youq ndaw sing go dou ciengq haenx. Lauxsae yaengx mehfwngz coh dou, gou riu lo, sawqmwh roxnyinh beij ndaej gwn dangzrwi lij van.

Ciengqgo sat, laj daiz sikhaek yiengj hwnj sing bekfwngz goksasa. Gou angq raixcaix, caen siengj mbouj daengz dou ciengq ndaej baenzneix ndei. Mwh roxdaengz dou ndaej daegdaengjciengj, uk gou youh yienh’ok gij yiengh dou roengzrengz lienh ciengqgo haenx, ndaw rwz youh dingq ndaej nyi lauxsae gangj coenz vah de……

（Huznanz Swngj Lungzveiz Yen Goujlungz Yozyau haj nienzgaep Huz Cenz)