Song ngoenz neix haihag,

Ngeix gag raen simfanz;

Hagseng mbouj caixhangz,

Sim gou fanzringring.

Ndaw gyajgeiz youq ranz,

Cix ganq caemz soujgih;

Neix haeujhag yozsiz,

Soujgih cungj mbouj lumz.

Ngamq cuengqhag daengz ranz,

Sikhaek caemz soujgih;

Doegsaw mbouj cizgiz,

Caemz soujgih guh daeuz.

Baenzhwnz caemz soujgih,

Dawz yozsiz guh lumz;

Loengh soujgih gvaq hwnz,

Hwnjdangz ninz gyaenhu.

Soujgih loengh daiq nanz,

Yingjyangj de siliz;

Yawj ndaej da raizri,

Hix gwq mbouj nyienh cuengq.

Yozyau miz gvidingh,

Ngoenzsinggiz ndaej dawz;

Ngoenz wnq aeu hag saw,

Mboujcinj dawz soujgih.

Lwgnyez bae yozyau,

Bouxlaux yaek nyinh daez;

Soujgih naengh dawz bae,

Lauxsae raen mozsouh.

Banneix sou lij oiq,

Coi hag saw cij baenz;

Mbouj you gwn you daenj,

Gaenx doegsaw cij ndei.

Doegsaw aeu haetneiq,

Gaej dan ngeix guhcaemz;

Cog sou geq daeuj daengz,

Miz ngaenz cungj nanz cawx.

Gyahcangj caeuq lauxsae,

Caez ganq ndei lwgnyez;

Lwgnyez lumj naed ceh,

Ganq de baenz faex hung.

Saedyienh loq Cungguek,

Couh baengh buek hagseng;

Banneix aeu roengzrengz,

Cog guek engq maenh’ak.