Daihgya cungj doengz rox,

Cienz goz gvaq cingmingz;

Caih mwngz youq Baekging,

Cingmingz daengz couh dauq.

Daengx guek gyangz cietheiq,

Aen ciet neix ceiq hung;

Daengx guek gak boux vunz,

Guenj bae cunz goengboh.

Gaxgonq sauq mohcoj,

Gyaeujhoq cungj daengz caez;

Caih youq gyawj youq gyae,

Guenj conz bae guhdoih.

Caemh bae sauq mohcoj,

Muengh wngqoq lwglan;

Bouxboux baenz gyaranz,

Ngeix lwglan raeuz vuengh.

Wngqoq lwglan sai,

Cienzcaiz raeuz caih yungh;

Gangj vah hongz baenz cung,

Vifung gvaq gyoengqvunz.

Wngqoq lwg caeuq yah,

Gak dah gwn ndaej lai;

Okbae baengzyoux lai,

Beij bouxsai lij giengz.

Bineix ngoenz cingmingz,

Mbouj doxsing(doxciengj) sauqmoh;

Gyoengqvunz byaij gwnz loh,

Raeuz gag rox ganq gaeq.

Dangh youq rog hwnjban,

Mbouj maranz sauqmoh;

Coengcoj de hix rox,

Ciuq wngqoq sou ndei.

Mbouj ndaej ma sauqmoh,

Goengboh de mbouj gvaiq;

Baedauq hoj dahraix,

De mbouj gvaiq daengz sou.

Mbouj ndaej ma cix liux,

Cojcoeng ciuq wngqoq;

Lwglan cungj roxsoq,

Ciuq wngqoq sou caez.

Raeuz gaj bit gaj gaeq,

Dawz bae caeq henz moh;

Miz ngaiz byaek laeuj noh,

De goq mbouj raen gwn.

Bohmeh youq yiengzgan,

Raeuz wngdang ciuqgoq;

Mboujguenj geijlai hoj,

Bouxcoz ganq bouxgeq.

Gyoengqde youq mbouj dam,

Lij gangj dai sauqmoh;

Hauqgingq bouxboux rox,

Ganq ndei coq ndawsim.

Bohmeh youq yiengzgan,

Raeuz wngdang fugsaeh;

Daengz ngoenzdai haeuj faex,

Miz caeq mbouj raen gwn.

Cingmingz aen ciet neix,

Raeuz aeu geiq ndaej maenh;

Lwglan miz mbouj caenh,

Sauqmoh daengj cojcoeng.

Cingmingz aen ciet neix,

Raeuz aeu geiq ndawsim;

Caeq huq youh diemj yieng,

Itdingh mbouj ndaej lumz.

Ngoenz cingmingz ciengz fwn,

Byaij roen wng haeujsim;

Diemj lab caeuq diemj yieng,

Itdingh miz vunz dawz.

Ngoenz cingmingz sauqmoh,

Bouxboux rox ngeix coj;

Bangeq ninz gwnz bo,

Bimoq youh daeuj caeq.