Seizcin baez daengz, baenz benq baenz benq va- byaekyouzcaiq hai lo. Gij va’byaekyouzcaiq neix caen gyaeu ha!

Gou mup daengz baenz raq baenz raq va hom, nyaenx mbouj ndaej buet haeuj ndaw reih byaek ba, sijsaeq cazyawj va- byaekyouzcaiq. Va’byaekyouzcaiq dwg saek henjgim, va de gungh miz seiq limq. Gij va neix comz youq gwnz dingj gaenj va, ndawgyang lij cab miz di giuz iqet, neix dwg valup va- byaekyouzcaiq. Youq gwnz gaenj, lij maj miz geij mbaw byaek hung heuyau, bien mbawbyaek miz faenzgawq, lumj bienva nei. Ndwn youq gizgyae yawj, doenghnaz va’byaekyouzcaiq couh lumj benq haij henjgim nei, raq rumz iq ndeu ci gvaq, gienj hwnj fanhcien langhva, ndeiyawj raixcaix.

Ndaw reih byaekyouzcaiq, haujlai duzrwi gaenxgyaek haenx vungvung gongz dwk、nyaengq dwk, youq gwnz va’byaekyouzcaiq ceng gonq lau laeng aeu dangz, lumj dwg naeuz: “Gaej ciengj, gijneix dwg gou, gijneix dwg gou!”

Dou youq ndaw reih va’byaekyouzcaiq guhcaemz doxndoj, okdaeuj le, gwnz gyaeuj cungj nem rim faenjva, bouxboux naj riu angqfaengz.

Va’byaekyouzcaiq dwg gij siengcwngh seizcin, gou gyaez va’byaekyouzcaiq neix.

(sam nienzgaep Fanhconz)