Bi’gvaq sujgyaj, bohnax daiq gou、dahnuengx caeuq song boux biujcej bae lajmbanj ranzdaiq guhcaemz. Ranz daxdaiq dwg giz dieg gou ceiq siengj bae haenx, daegbied dwg seizhah, doenghgij lwgbieng、gveswhgvah、lwgfaeg、lwggwz、haeuxyangz、duhbwn haenx, cungj baenz aen lo, lox vunz maij dangqmaz. Seizneix, gou mboujdan miz fuk ndaej raen gijde, lij miz fuk ndaej gwn gijde.

Swnh rumz ndatfwdfwd, dou daeujdaengz ranz daxdaiq. Dou caeuq daxdaiq bae ndaw suen mbaet lwgbieng gonq, ndaejraen gij gaeu heuloeg haenx nem diuz faexcuk gag ietraez hwnj gwnz bae, raih rim daengx aen gyanghongh. Gij mbaw hung haenx, mwngz caenx gou, gou cengj mwngz, mbouj doxnyiengh, youh doxing dwk, lumj gaiq baexdangj heuloeg ndeu. Dou moix boux vunz cungj mbaet aen lwgbieng he, aeu raemxsaw cueg baez ndeu couh gwn lo, lwgbieng byoiqcadcad, oiqcupcup, raemx lwgbieng cungj rim aen bak liux.

Ndwn youq laj gaq gveswhgvah, ndit daj geh mbaw laeuh gvaqdaeuj, gwnz ndang gou lumj vanq le caengz faenjgim ndeu. Va’gveswhgvah henj- rwgrwg, youq ndaw rumz biyaegyaeg, couh lumj duzmbaj diuqfoux yebyeb nei. Gvaq geij ngoenz le, couh miz aen gveswhgvah heusausau he venj roengzdaeuj. Duz biengzbeih miz saek seiz dingz youq baihgwnz, duzrwi youq gyang vagve baebae dauqdauq, ndaw suenmak yaek guh diuqfoux biujyienj lo.

Lwggwz miz aen heu aen aeuj, mbangj aen ndoj youq laj mbaw yietliengz, miz mbangj aen youq laj ndit deng ndit ciuq ndaej ronghgywggywg. Makyungz ronghngaungau, miz mbangj heu lumj feijcui, miz mbangj hoengz lumj majnauj, aenaen luenzlulu, dwggyaez dangqmaz. Dou moix boux mbaet aen makyungz ndeu, buet daengz henz dah swiq, mboujguenj sam caet ngeihcib it gwn hwnjdaeuj. Makyungz miz di soemj youh miz di van, raemx makyungz rim aen bak bae, lij ndik youq gwnz vunj gou, lumj siuq duzmbaj hoengz youq gwnz vunj nei.

Gou lij caeuq gyoengq doih iq caez bae euj haeuxyangz, “gaca” sing ndeu, vaek haeuxyangz couh duetliz gwnz go haeuxyangz lo, yienghneix, dou sikhaek dawz bae gwnz feiz ring gwn, naednaed homdiemz, beij gij haeuxyangz cawj ndaw rek haenx ndeigwn lai lo.

Aen suenmak laeng ranz daxdaiq dwg aen suenmak hung ndeu, engq dwg giz dieg guh’angq dou.

(Wuzsiz Si Lungzdingz Sizyenz Siujyoz roek nienzgaep (4) ban Lij Yiyauz )