Banhaet, gou deng gij sing byaj “maenjhumhum” haenx cauz singj, yawj ok baihrog conghcueng bae, gwnzmbwn lumj deng bouxlawz dwk boek raemxmaeg nei ndaemndatndat, seiz mbouj seiz lij bag geij diuz byajyap daeuj. Yawj yienghneix, yaek doek fwnraq lo.

“Hum hum hum!”, sing byaj yied daeuj yied hung、yied daeuj yied gaenj, lumj roq gyong hoenxciengq nei cung gvaqdaeuj. Rumz hix daeuj couqnauhyied lo, “huhuhu” ci hwnjdaeuj, ci naedfwn ndik gwnz benjcw’ndit yiengj “dikdaek dikdaek”, ndik youq gwnz gofaex, ndik youq gwnz dieg…… gyoengqvunz byaij gwnz gai hung luengq iq haenx, byaij nyaengqfoedfoed, miz mbangj ndonj haeuj laj yiemhranz bae ndoj fwn, miz mbangj gang liengj laebdaeb byaij baenaj, lij miz mbangj vunz, ndang daenj buhfwn, gyaeuj gang aenliengj, cwxcaih soengyungz byaij dwk. Ciep dwk, baenz roix baenz roix liemzcaw venj youq gyangmbwn, mok- mumu. Ciemhciemh, rumz yied bongj yied gip, fwn yied doek yied hung, aenmbwn lumj deng vunz gyongz byoengq nei, fwn doekcancan, mbouj dingz mbouj duenh. Rumz hix ci huhu, bongjfafa, sawj vunz lau ndaej dungxmbouq ndangsaenz, mbouj gamj byaij baenaj. Raemxfwn riengz aen gingqcueng laesansan, gij faex baihnaj conghcueng bienq ndaej moengz- loengz lo, gij vunz byaij gwnz loh haenx mbouj raen lo, ranzlaeuz lumj yaek deng at lak nei hawj vunz dwglau, daengx aen daihdeih lumj bouxnyieg rap rapnaek nei, caih fwnrumz doegdaemh、conxgyongx, haeb heuj gengget dingjcengj dwk.

Daih’iek gvaq 20 faen cung le, rumz gipgip muengzmuengz deuz lo, fwn daj baenzbenq bienqbaenz diuzsei, daj diuzsei bienqbaenz le mbawgaen dingj- gyaeuj goengqbya. Raemx gwnz goengloh laecancan haenx, angqfwdgwd ciengq dwk go lae haeuj mieng lajdeih bae. Nga faex deng rumz ci raek haenx lumj boux vunzlaux deng sieng neix vang youq gwnz roen, vunz mbouj ndaej mbouj gvax roen byaij bae, ganj bae dieg guhhong bonjfaenh. Diuz saidoengz ndeu, lumj aengiuz iq, lumj maesai, lumj seicouz nei venj youq gwnzmbwn. Yaep ndeu, aen giuz iq neix、 diuz maesai neix、 mbaw seicouz neix menhmenh bienq damh lo, bienq mbaeumbeng lo, youq gwnzmbwn lamzyubyub haenx siu bae……

(Gvangjsih Hozciz Si Sizyen Siujyoz Fwnhyau Aumwnzcwngz Yau- gih roek(1)ban Cinz Ciuhyij)