Yawj daeb cozyez ndeu doi youq gwnz daiz, gou caen mbouj siengj sij lo, hai, cozyez baenzlawz baenzneix lai?

Raq rumzliengz ndeu ci daeuj, ci gwnz naj gou, hix ci byoem gou mbinfefe hwnjdaeuj, cwxcaih dangqmaz, sawj gou yaep couh siengj daengz seiz gaxgonq.......

Mwh lij iq, daxmeh ciengzseiz umj gou naengh youq gwnz yangzdaiz gaebgeb haenx dat makbingzgoj hawj gou, aendaeng ndaw ding miz di amq, aenda daxmeh dwg baenzneix unqswnh…… Raq rumz ndeu ci gvaqdaeuj, liengzsisi ci youq gwnz naj, gou yawj daxmeh naj riunyumnyum.

Raq rumz neix miz di lumj rumzcou, liengzyaujyauj, hoeng cix hawj vunz roxnyinh daengz raeujrub. Mwh raq rumz neix ci daengz gwnz naj gou, gou lumjbaenz dauqma daengz seiziq, cingq ninz youq ndaw rungj daxmeh raeujrub haenx, gwn makbingzgoj ngaebngaeb……

“Feihfeih, mwngz ngaez gijmaz ne?” Daxmeh sawqmwh cam gou, dwk goenq gij ngeixsiengj gou bae.

“O, daxmeh, rumz neix cwxcaih raixcaix! Mwngz hix daeuj gamjsouh baez ndeu ba!”

Daxmeh byaij daengz henz congh- cueng, rumz ci youq gwnz naj de, “dwg bw, caen cwxcaih lai bw!”

Gou doiq daxmeh naeuz:“Meh ha, gou roxnyinh gij rumz neix ci youq gwnz naj, couh lumj dauqma daengz seiziq, gou cingq ninz youq ndaw rungj mwngz, gaemz dem gaemz gwn gij makbingzgoj mwngz dat hawj gou haenx!”

“Dwg ha? Dahlwg gou roxsoq lo! Mboujgvaq, mwngz vaiqdi bae sij cozyez ba, yaep ndeu yaek gwn haeux ho!” Daxmeh lumhlumh gyaeuj gou le, doq gangj vah doq bae ranzdajcawj nyaengq hong lo.

Seizneix, baihrog conghcueng doek fwn lo, gou roxnyinh engq rumz engq liengz lo, miz di nit, gou ganjvaiq bae ra geu buh ndeu longz gwnz ndang bae.

Gij rumz seiziq, couh yienghneix siusaet lo, de seizlawz caiq dauqma,youh liengzsisi ci daengz gwnz naj gou ne?

(Gvangjdungh Swngj Cinghyenj Si Cinghcwngz Gih Fungmingz Siujyoz sam nienzgaep Sinh Yijfeih)

faenzcieng banjneix dwg Veiz Yennaz fanhoiz