Moix boux vunz cungj miz gij loqsiengj swhgeij, miz mbangj vunz siengj dang lauxsae, ndaej son saw ganq vunz, miz mbangj vunz siengj dang canghyw, gouq bouxbingh yw bouxsieng, lij miz mbangj vunz siengj dang boux yijhangzyenz, ndaej damqra gij mimiz gwnzmbwn haenx……Hoeng gij loqsiengj gou dwg dang boux cozgyah ndeu, sij haujlai saw mizyinx ndeiyawj, soengq hawj vunzlai yawj doeg.

Gangj daengz gij loqsiengj cozgyah gou, lij aeu daj gou ndaej song sam bi mwhhaenx gangj hwnj. Seizhaenx, ndaw gvihsaw ranz gou miz haujlai saw, gou ceiq caeux cij rox yawj saw dozveh, doeklaeng rox cihsaw lai le couh hainduj yawj 《Dahsau Fwngzmeh》《Gojgaeq 365 Haemh 》 daengj saw gojlwgnyez. Mizseiz, daxboh lij gangj di gojgaeq gou coengzlaiz mbouj dingq gvaq haenx hawj gou, de naeuz gou nyi, gij gojgaeq neix cungj daj ndaw saw ndaej daeuj, yienghneix, gou doiq yawjsaw mizyinx raixcaix.

Mwh gou doeg siujyoz it nienzgaep, youq Roek It Ciet Lwgnyez haemh gonq, gou youq hagdangz biujyienj ciengqgo, dauqma ranz le, gou dawz gij gamjsouh biujyienj gou sij baenz hot sei ndeu. Seizhaenx, gou lij mbouj rox sei dwg gijmaz, cij rox hangz dem hangz sij gij siengjfap ndawsim gou, bungzdaengz cih mbouj rox sij, gou couh sij gyoepyaem daeuj lawh. Daxboh daxmeh yawjraen hot sei gou sij haenx le, haenh gou youh gujli gou.

Daengz ngoenz gyajgeiz, daxboh daxmeh ciengzseiz daiq gou bae guhcaemz, gou youq mwh guhcaemz menhmenh hag rox le cazyawj caeuq ngeixnaemj. Miz haemh ndeu, daengx ranz vunz youq henz Dahbwzgyangh byaij, yawjraen gwnz dah langhraemx fubfeb, ndaw uk gou sawqmwh mauh ok gawqvah “laeuzsang dwg gij baengzyoux henzndang Dahbwzgyangh” “diuz dah neix caen lumj diuz saidoengz gyaeundei ndeu bienqbaenz” yienghneix daeuj.

Dauqma daengz ranz, gou gig vaiq sij baenz hot sei 《Doengxhaemh Dahbwzgyangh》. Doeklaeng, daxboh dawz sei gou geiq bae bause, mbouj gvaq geijlai nanz, sei gou ndaej youq gwnz bauqceij fatbiuj lo. Banh cujyin Mung lauxsae yawjraen bien sei ndaej fatbiuj gou haenx, youq ndaw ban haenh gou. Couh yienghneix, gou yied daeuj yied maij sij faenzcieng, yied daeuj yied miz yinxdaeuz sij faenzcieng lo. Doeklaeng, gou laebdaeb youq gwnz bauqceij fatbiuj faenzcieng,《Lwgmbauq Lwgsau》《Guengjdoeng Dangzgoq Daihngeih》《Bauq Lwgnyez Lajmbanj》daengj doenghgij bauqceij cazci neix lij hawj banjmienh dandoeg daeng faenzcieng gou, gou baenz le boux “cozgyah iq” gyoengq doengzhag hozhaenz ndeu.

Daxboh ciengzseiz doiq gou gangj, boux vunz ndeu mboujlwnh baezlaeng guh hong gijmaz, siengj aeu ndaej cingzcik, cungj aeu mboujduenh roengzrengz, guh boux cozgyah hix dwg yienghneix. Yaek siengj baenz boux cozgyah ndeu, mboujdan aeu hag gak cungj vwnzva cihsiz, lij aeu lai doeg lai sij lai coihgaij, mbouj lau baeg. Gou rox, gij loqsiengj cozgyah gou lij gig gyae, hoeng cijaeu gou roengzrengz buekguh, genhciz mbouj cuengqsoeng, gou saenq cungj miz ngoenz ndeu, loqsiengj gou bienqbaenz caen.

（Gvangjdungh Swngj Cinghyenj Si Cingh- cwngz Gih Fungmingz Siujyoz sam nienzgaep Sinh Yijfeih）