Raq fwncin he doek gvaq le, gou caj mbouj gib daeujdaengz aen hongh ranz gou.

Va, ndaw hoengheiq singjsien, duz “doengz” ndeu cingq gvenj youq aen hongh ranz gou. Neix dwg duz “doengz” geijlai gyaeundei ndeu ha! De lij ndik raemx coh laj ne!

Yi? Du “doengz” baenzlawz ndaej ndik raemx ne?

Laxlawz dwg dougungj aen hongh ranz gou, dougungj saekhenj de deng fwncin swiq ndaej henjrwgrwg. Gwnz dougungj raih rim gova, mbaw gova deng raemxfwn swiq gvaq le, heuyauyau, ndik raemxfwn gwnz mbaw hix manzgyaengj dwk buet bae buet dauq.

Fwn doek gvaq le, duj va couh engq gyaeundei lo, miz saekhoengz, miz saekmaeq, miz saekgyaemq, lij miz saeknding. Saeknding lumj daengngoenz nding’yanyan, saekmaeq lumj aen naj dahsau maeqfwdfwd, saekgyaemq lumj majnauj ronghmyigmyig, saekhenjnding lumj fwjhaemh lwenqlamlam. Saekheu, saekhenj, saeknding, saekmaeq, saekgyaemq, saekhenjnding, ingj youq laj mbwn oatat, mbouj couh dwg duz “doengz” gyaeundei ndeu ha?

Aen hongh ranz gou caen gyaeundei!

（Vazdungh Swhfan Dayoz Suhcouhvanh Sizyen Siujyoz it nienzgaep Yiz Sienghyiz）