Seizcin daeuj lo, dienheiq menhmenh raeuj lo, cumx lo.

Gyanghaet, rog dou “buci buci” yiengj dwk, neix dwg byawz daeuj roq dou ne? Hwnqdaeuj hai dou, fofofo, yo, dwg rumzcin diuqbeiz daeuj lo. Laeq diuqbeiz neix cup aen naj gou, yaengyaeng bek fwngz gou, biengj gok buh gou, ci luenh byoemgyaeuj gou, byoem led aen hoz gou humzsisi.

Bae! Bae! Bae! Gaej cauz gou lo!

Hoeng de mbouj guenj gijneix, heux gvaq henz ndang gou, coemj hwnj gwnz daiz bae, fofofo biengj saw gou, youh ci mbin gij veh gou, mbatneix gou huj lo: Mwngz caiq daujluenh, gou mbouj leix mwngz lo! Siujsim gou gven mwngz youq ndaw ranz mbouj hawj mwngz okbae. Rumzcin diuqbeiz lumjdwg lau lo, baez cienq ndang, ndonj ok dou bae, ngauz go makgaivaiz ndaw hongh, bued nga faex laehcei geq, youh ci gvaq doenghnaz, lij mbouj lumz vax aeu gaem nywj roz ndeu, it loh angqfwd ciengqgo. Fofofo! Seizcin daeuj lo, go’nywj vaiq did ngaz, gomak vaiq hai va, vei! Daxgoeng daihdeih, mwngz vaiq ndiu lo.

Gizgyae, daxgoeng bya daenj buhfwj, hoemq denzmok, lij ninzndaek fufu, rumzcin raen le youh bongj hwnjbae, daxgoeng bya mwngz gaej gik lo, gou bang mwngz duet buh, vaiq di ndiu daeuj! Fofofo、fofofo, de bued denzmok, sik buhfwj, dawz ndit daiq daengz henz ndang bya hung, daiq daengz baihnaj diuz rij sawndik, daiq daengz ndaw doenghnaz gvangqlangh, daiq daengz aen mbanj hoenzfeiz hwnjngeungeu haenx.

Daxgoeng bya ndiu lo, dahnuengx rij riu lo, doenghnaz angq lo, aen mbanj gyaeu lo, nywj iq ndonj aen gyaeuj okdaeuj, va’ndokgengj loh’ok najriu de, byalwg yat ok naj raemx, hoenzfeiz niuj aen ndang de, diuq hwnj foux angqyangz!

Ho! Rumzcin diuqbeiz; ho! Rumzcin angqyangz. Fofofo、fofofo, simsoh、gvai- gvet, rumzcin mbouj rox naetnaiq bae gyaep seizcin neix, daemj hai aen sim gou, hawj gou yawjraen ngoenzcog gyaeundei.

Gou siengj coux hwnjbae, rag fwngz mwngz riengz mwngz doxcaez bae heuh sojmiz doenghyiengh ndiu daeuj, coi va hai doh.

Ha! Rumzcin diuqbeiz, gou gyaez mwngz!

(Fuzgen Swngj Anhhih Yen Daih Cib’it Siujyoz Linz Yizfanz)