Rumzbaek cihuhu haenx ninzndaek lo, nae hausagsag haenx ma ranz lo, doengh- yiengh ninzndaek haenx ndiu daeuj lo…… Dahsau seizcin langman haenx yamq din mbaeumbeng de, daeujdaengz aen daihdeih dwggyaez neix.

Yawj! Raemx dah “dingdung dingdung” ciengq dwk go, geijlai angqyangz, geijlai ndeidingq! Naj raemx dah fouz miz limqva hoengzmaeq, dwg byawz diuqbeiz ne? O, de dwg rumzcin unqswnh, dwg de ci loenq limqva dahnuengx vadauz caeuq limqva dahnuengx vayinghvah henz hamqdah. Vaiq yawj gyoengq dahnuengx, aen ndang gyaeundei de, gemjnaj hoengzmaeq de, baenz geu baenz geu vahom de, dwg geijlai hawj vunz fiz hawj vunz maez ha. Ha, aen seizcin langman neix!

Gyoengq dahnuengx baenzneix gyaeundei, suenva baihlaeng de va hai ndaej hoenghhwd neix baenzlawz ndaej fug saw ne? Vameizgveiq ceng gonq lau laeng dawz duj va hoengznding hai youq dingjgyaeuj, mwngz caenx gou mbat he, gou bungq mwngz mbat he, byawz hix mbouj nyiengh byawz; gyoengq vamauxdan hix gang hwnj gak saek gak yiengh liengj iq, miz saekmaeq、saekhenj、saekgyaemq、saekraiz nding hau…… gyaeundei dangqmaz; gyoengq vayilanz hix cungj ndonj okdaeuj, baenzneix maezvunz…… Ha, aen seizcin langman neix.

Mwhde, henz suenva cienz daeuj singriu lumj duz cinglingz riu nei, lumj diuz go ndeidingq nei. Sijsaeq yawj, laxlawz dwg gyoengq lwgnyez dwggyaez ndeu. Gyoengqde miz mbangj doxcaez cuengq yiuhrumz, miz mbangj youq diegnywj guhcaemz, miz mbangj youq henz suenva mup vahom…… Gyoengq lwgnyez cuengq yiuhrumz haenx, fwngz gaem sai yiuhrumz, youq gwnz diegnywj buet bae buet dauq; gyoengq lwgnyez guhcaemz haenx, miz mbangj guhcaemz “san swxva”, miz mbangj fwngz gaem fwngz gvaengz baenz gien, din dap youq gyang song fwngz cienq dwk diuq; miz mbangj guhcaemz “duzyiuh gaeb gaeqlwg”, boux vunz he ndwn youq baihnaj, gizyawz vunz ndwn youq baihlaeng, moix boux vunz fwngz dap youq gwnz mbaq boux baihnaj ndoj “duz yiuh”; lij miz vunz guhcaemz doxndoj, boux vunz he ndwn youq cungqgyang geq ngeihcib aen soq, gizyawz vunz ganjgip ra giz dieg ndeu daeuj ndoj…… Seizcin hawj gyoengq lwgnyez caenhcingz guhcaemz. Ha, aen seizcin langman neix.

“Momo——” gizgyae dwg gyoengq vaiz he cwxcaih gwn nywj. Aen geiqciet neix lienz duz vaiz cungj bienq ndaej vaiqvued lo. Doenghduz wnq hix caez ngonzyawj gingjsaek seizcin gyaeundei maezvunz neix.

Ha! Aen seizcin langman neix!

(Suhcouh Si Gauhsinh Gih Swhsanh Sizyenz Siujyoz Ciz Hihyiz)