Singhgiz gonq ngoenz singhgiz sam, ban dou guh baez modaej Yinghyij gaujsi ndeu.

Mbaw sigenj fat roengzdaeuj, gou simgaenj yawj mbat he——92.5 faen! Gou laihnaeuz gauj ndaej haemq ndei, hoeng mbouj liuh daengz gaenq baiz daengz daengx ban daih 14 mingz lo.

Gou mbouj miz banhfap, ndawsim hojsouh lumj deng haujlai non gaet nei. Gwnz sigenj baenz aen baenz aen ca nding, dwg geijlai lwenqda, geijlai coegda ha, couh lumj baenz fag baenz fag mid nding nei, cig camx haeuj aensim gou. Gou doiq swhgeij mbouj muenxeiq, youh lau deng bohmeh ndaq.

Gwnz loh cuengqhag ma ranz, gou dungxcig mbouj onj dawz gij saeh neix cienzbouh lwnh hawj daxmeh nyi. Daxmeh mboujdanh mbouj gvaiq gou, dauqfanj vah naek cingz laeg doiq gou naeuz: “Mbouj youqgaenj law, baezlaeng caiq roengzrengz!” Gou naiqnuknuk ma daengz ranz, haeuj ndaw rug bae, naiq lumj gaeqraq neix dak ninz gwnz mbonq.

Gou siengj bae siengj dauq, roxnyinh daxmeh gangj ndaej deng, cijmiz roengzrengz cij ndaej soundaej, gou hix yaek roengzrengz! Gangj guh couh guh, gou gaem hwnj saw Yinghyij doeg hwnjdaeuj, moix ngoenz lij guh geij diuz daez, yienghneix guh doiq daezsang cingzcik Yinghyij gou bangcoh gig hung.

Gvaq geij ngoenz le, youh miz baez Yinghyij gaujsi ndeu. Gou saenqsim cibcuk, ciep gvaq sigenj, yawjyawj le, raen genjdanh lai lo! Yienghneix couh dawz bit daeuj, vaiqvet dap daez.

Roekcib faencung le, sou sigenj lo, gou ndawsim miz daej dawz sigenj gyau hwnjbae. Banringz, lauxsae Yinghyij daeuj ndaw ban bauq cingzcik. Gou fwt simgaenj fwdfwd, ndawsim lumj miz ndaek rin hung he dimz gwnzde, lauheiq gauj ndaej mbouj ndei. “Daih’it mingz, Goh Gyahgyangz; daihngeih mingz, Cuh Yijhanz……” Sim gou mbat gaenj mbat soeng, cungjsuenq dingqnyi aen coh gou lo, gou dwg daihhaj mingz, beij baez gonq cinbu gouj mingz ne! Ndaek rin dimz gwnz sim gou hix cuengq roengzdaeuj lo.

Gienh saeh neix lwnh gou, mwngz roengzrengz geijlai soundaej couh geijlai, yied roengzrengz, soundaej couh yied lai!

(haj nienzgaep Cenz Cicwnz)