Fwn doek, dwg gienh saeh gig geizmiuq ndeu. Fwn mizseiz lumj boux youz boihvunz ndeu, laeglemx daeuj, laeglemx bae; mizseiz lumj dah niq launyaenq ndeu, naj goemq baengzsa; mizseiz lumj boux cienghginh maenh’ak ndeu, daiq cien bing fanh max, cungfafa roengzdaeuj.

Ngoenzneix banringz, daxgoeng byaj ging- doengh daihdeih, gunglunglung, gunglunglung yiengj mbouj dingz, lumj boux lawz nyex huj de nei. Gvaq yaep ndeu couh fat beizheiq, fwjndaem deng hwk dwk lae raemxda. Gij raemxda neix ha, couh lumj roix caw diuz mae de raek le, naed caw bada bada doek roengzdaeuj. De baez daej ha, couh mbouj rox dingz. Cijmiz go nywj, angq- fwngfwng, bek fwngz riu mbouj dingz, gyoengqde itdingh riu doenghgij raemxda daj gwnzmbwn doek roengzdaeuj haenx. Biengzbeih caeuxcaeux couh ndoj haeuj ranz bae, deng hwk dwk mbouj gamj ok dou lo. Byalwg ndaw daemz yat ok naj raemx, lumj dwg okdaeuj coux naed caw hung lumj naed duh nei. Roeglaej manzgyaengj di ndeu hix mbouj roxsoq, deng fwn rwed lumj duz gaeq doek raemx nei le lij youq gyang fwn hemqcica, lumj yiengjsouh gij angqyangz dajcaemx gvaq nei.

Mbouj rox seiz lawz, fwn laeglemx dingz lo, gou byaij ok ranz bae, caeuq rumz iq doxdaemj. Fwn doek gvaq le, caen sangj ha!

(ngeih nienzgaep Vangj Loz)