Seizdoeng daeujdaengz, ndaw ndoengfaex gizgiz cungj dwg hausagsag, mou iq Gizgiz dam guhcaemz haenx mbouj bwh saekyiengh doxgaiq gvaq seizdoeng, baezneix de boihseiz lo! De gutgungq youq gungxgok ndaw rug, saenz- dedded. De naeuz: “Danghnaeuz gou bwh ndei gijgwn, bwh ndei lozfeiz, seizneix couh mbouj nit baenz yienghneix lo.”

“Dung dung dung”, sing roq dou cienz haeuj ndaw rwz Gizgiz, de siengj: Dwg byawz ha, mbwn nit baenzneix, byawz lij ok dou ha? Gizgiz geizheih dwk ganjvaiq bae hai dou. “Ndei lai lo, meuz iq Yenzyenz daeuj lo, vaiq haeujdaeuj.” Gizgiz itmienh gangj, itmienh aeu lozfeiz ndaw fwngz Yenzyenz dawz haeuj ranz. “Raeuz bae sousib aen rug ba, sousib ndei le raeuz byoq feiz.” Gangj guh couh guh, songde nyaengq ndaej hanh cungj lae lo, ndaw rug bienq seuq lo. “Ha, naengh gwnz mbonq seuqsak, byoq feiz raeujrub, geijlai vuenyungz ha!” Song boux de caemh sing gangj dwk.

“Dung dung dung”, youh miz sing roq dou cienz haeuj ndaw rwz Gizgiz, de siengj: Baezneix dwg byawz ha, mbwn nit baenzneix, byawz lij ok dou ha? Gizgiz geizheih dwk ganjvaiq bae hai dou. “Ndei lai lo, ma iq Dwnghdwngh daeuj lo, vaiq haeujdaeuj.” Gizgiz itmienh gangj itmienh aeu mienhbau ndaw fwngz Dwnghdwngh dawz haeuj ranz. “Raeuz bae sousib fuengzgwnhaeux ba, sousib ndei le raeuz gwn mienhbau.” Gangj guh couh guh, sam boux de nyaengq ndaej hanh cungj lae lo, fuengzgwnhaeux bienq seuq lo. “Ha, naengh gwnz eij cingjcaez, byoq feiz raeujrub, gwn mienhbau homfwd, geijlai vuenyungz ha!” Sam boux de caemh sing gangj dwk.

“Dung dung dung”, youh miz sing roq dou cienz haeuj ndaw rwz Gizgiz, de siengj: Baezneix youh dwg byawz ha, mbwn nit baenzneix, byawz lij ok dou ha? Gizgiz geizheih dwk ganjvaiq bae hai dou. “Ndei lai lo, lingz iq Bizbiz daeuj lo, vaiq haeujdaeuj.” Gizgiz itmienh gangj itmienh aeu geij bonj saw gojgaeq ndaw fwnz Bizbiz dawz haeuj ranz. “Raeuz bae sousib aen ding ba, sousib ndei le gou doeg gojgaeq hawj sou dingq.” Gangj guh couh guh, seiq boux de guh ndaej hanh cungj lae lo, ndaw ding bienq seuq lo.

“Doenghbaez, miz seiq boux baengzyoux ndei……”. Gyoengqde naengh youq gwnz sahfaz mou iq, byoq lozfeiz meuz iq, gwn mienhbau ma iq, dingq gojgaeq lingz iq, ndaw- sim cungj gag siengj, caeuq baengzyoux ndei doxcaez gvaq seizdoeng, mbouj couh dwg aen seizdoeng vuenyungz ndeu ha?

(Cangzsah Si Funghsusanh Cungh- hangzcwngz Siujyoz Yoz Swhhanz)