Daxgoeng daxbuz youq lajmbanj, moix bi seizcin cungj ndaem gohuq, baez daengz seizde, daxbuz couh louz ok gaiq dieg ndeu hawj gou. Bineix gou gietdingh ndaem duhhenj.

Daih’it dwg soeng namh. Youq daxgoeng bang gou lajde, gou yungh aenrauq seiq faenz rauq reih, yienzhaeuh dawz namh dub soiq, vat luengq iq. Daxbuz ra cehduh hawj gou, gou dawz cehduh vanq youq ndaw luengq iq, goemq namh hwnjbae, caiq vanq di modfaex, modfaex ndaej re namh raemx lae bae. Yienghneix couh ndaem ndei lo. Gou ngoenzngoenz muengh, hwnzhwnz muengh, duhhenj dauqdaej did ngaz lo. Gyoengqde ndonj ok namh daeuj, riengz rumz bidoengh, lumj vad fwngz coh gou nei. Gou angq dwk rag daxgoeng daeuj yawj ngaz duh. Daj neix gvaqlaeng, gou moix ngoenz cuengqhag ma ranz sij sat cozyez le couh bae cazyawj gyoengqde, maqmuengh yawjraen ngaz duh bienqvaq. Baez yaepda, geij ngoenz gvaqbae lo, ngaz duh song dip duh loenq le, mbaw duh hainduj maj okdaeuj. Seizde dwg seiz maj ndaej vaiq, gou hainduj byoq bwnhnajmbaw, dinghseiz rwed raemx. Menhmenh dwk, duhhenj haeuj duenh majhung daihsam, daj miuz duh bienq- baenz go duh, gou angq lai lo. Hoeng, ngeix mbouj daengz cainanh daeuj lo, go duh deng duz nou gaet raek geij go lo. Gou gig siengsim, gou siengj henhoh geij go duh lw roengzdaeuj haenx. Gou youq henz cuengq ywnou, miz yungh dahraix bw, go duh lw roengzdaeuj haenx hai ok va iq saekgyaemq, doeklaeng dawz faek heusau benjbed. Ngoenz gvaq ngoenz, faek duh bongq hwnjdaeuj bienq fag lo, daengz seizcou, mbaw duh loenq lo, cij lw faek duh bienq henj baenzcug haenx lo. Mwh sou duh, gou miz cungj angqfaengz gangj mbouj ok ndeu.

Faenh ndaemndai ndeu faenh souh- ndaej ndeu, gou mbouj dan soundaej duhhenj, lij soundaej vaiqvued, caen dwg guhhong ceiq miznaj!

(Hwzlungzgyangh Swngj Suih- lwngz Yen Daih’it Siujyoz seiq (3) ban Liuz Vanh)