Va ciengj gonq lau laeng ndaetndet humx youq doxcaez, mwngz nyoengx gou caenx dawz valup oiqet ndonj ok aen led lumj raen mbouj raen de. Gou dinghdingh yawj aen led hai rim va、gyaqciq haenx, aen uk mbouj youz ndaej swhgeij siengj daengz doenghbaez.

Cib geij bi gonq, gou riengz bohmeh youq ranz yahdaiq lajmbanj youq. Mwhde, ranznden seiqhenz cungj caengz buen bae; mwhde, ndaw doengh gvangqlangh ciengzseiz rwenz sing riu gou caeuq doengzdoih; mwhde ranzgeq, lij dwg aen ranzgeq dou; mwhde naj ranz lij humx miz gien led daengjsoh ndeu.

Mwhde gou maij caeuq doengzdoih ranznden guhcaemh “gaeb vunz”. Youq gwnz dieg veh gien ndeu, vunz rog gien mbouj miz banhfap “gaeb” dawz vunz ndaw gien. Doeklaeng, aenvih naj ranz yahdaiq miz aen hongh daegbied hung ndeu, dou couh dawz aen hongh yahdaiq dangqguh aen “gien” ancienz. Gou mbouj rimhoz ha, gou hozhaenz naj ranz daeggo ranznden miz baiz led iq ndeu, ndoj haeuj ndaw led lumj dwg loq ancienz di nei, yienghneix, gou couh ngaeq yahdaiq hix guh aen led ndeu, yienznaeuz gou mbouj rox guh aen led gietsaed ndeu, yaek sai geijlai seizgan caeuq goengrengz, youq gou ngaeq hwnj ngaeq roengz lajde, yahdaiq guh hawj gou lo.

Lajmbanj gaeq haen ma raeuq, ndaw hongh lwgnyez guhcaemz bouxlaux nyaengq hong. Youq laj ndit dak ndit, led moq lumjbaenz hix caeuq dou doxcaez cwxcaih angqfaengz.

Doeklaeng, gou ciemhciemh majhung di lo, hag gij yiengh vunzhung heux aen led gyaengq dwk—— gyoengqde youq ndaw naz rog led ndaem gomiuz, gou naengh youq ndaw led dajleix valwgbaenq gwnz led. Ndit、va、doenghnaz、aen led…… Gou mbouj dingz gaex、gven douled, seizgan laeglemx daj ndaw sing douled ngingi ngednged ndonjdeuz.

Caiq doeklaeng, ranzgeq yaek cekbuen lo, gyoengq ranznden gaenq buen bae ndaw singz, youq aen laeuz geij caengz sang youq, hoeng gou caeuq yahdaiq gyoengqde cungj sij mbouj ndaej gizneix, gou daegbied sij mbouj ndaej baiz led caemdingh haenx, gou daej dwk nauh dwk, baengh gij gou nienzgeij iq mbouj roxsoq, yungh rengz umj dawz aen led mbouj nyienh cuengq fwngz, hoeng youq baihnaj aen duihdujgih sangvid hunghwd haenx, gou lau lo. Seizgan hawj gou aen seizlwgnyez mbouj heiq mbouj you ndeu, doeklaeng hix daiq gij goekgaenq angqfaengz gou bae.

Gou byaij youq ndaw singz cauzhumhum, youq suenva ndaw singz gou caiq baez roeb daengz aen led lo, de caeuq aen led maj rim gojgaeq ndaejgeiq gou di ndeu hix mbouj doengz, hoeng de cix ndaej sawj gou siengj hwnj aen led seizlwgnyez. Aen led maj rim gojgaeg haenx itcig buenx gou majhung, buenx gou byaij loh engq gyae.

(Gyanghsuh Swngh Swhungz Yen Swhungz Gyanghyen Gaugaep Cunghyoz gau ngeih Gyauz Ging’yih)