Daj iq daengz hung daxmeh couh son gou, gwn haeux yaek miz gij yiengh gwn haeux, yaek caj vunz daengz caez le cij ndaej gwn; mwh gwn haeux, mbouj ndaej diu gwn, mbouj ndaej haeux byaek doek, mbouj ndaej duet haiz, engq mbouj ndaej giuhga; danghnaeuz miz hek daeuj, yaek hawj bouxhek dawz dawh geb byaek gonq……

Gou daegbied maij gwn noh, geiq ndaej miz baez ndeu, daxmeh cawj noh cauj lwgmanhheu, gou ndwn youq bakdou ranzdajcawj, yawj noh ndaw deb, myaij rih lo.

Caj gwn ceiq nanz ngauz. Mbouj yungzheih caj vunz daengz caez lo, haeux byaek hix hwnj daiz caez lo, dawh ndaw fwngz gou couh hainduj mbouj dingz bae geb byaek, cienmonz geb noh gwn. Daxmeh raen le, ae mbat ndeu. Gou ngiengx gyaeuj baez yawj, naj daxmeh gig yiemz, mwhde gou cij siengj hwnj laex gwn haeux daxmeh son gou haenx. Gou ganjvaiq dingz fwngz, daxmeh dwg boux “fapguen” ranz gou ne, danghnaeuz miz vunz mbouj dingq vah, neix aiq deng moeb bw.

Mboujgvaq, youq daxmeh yiemzguenj baihlaj, moix baez gou caeuq vunz ndaw ranz ok rog caeuq baengzyoux gwn haeux, gyoengqvunz cungj haenh gou dwg boux lwgnyez miz laex ndeu.

(Sanhdungh Swngj Caujcangh Si Sicunghgih Gensez Lu Siujyoz ngeihnienz gaep Vei Yenzboz)