Daxboh dwg boux ienyinx okmingz ndeu, moix ngoenz cungj yaek cit song bau ien, ndaw ranz gingciengz hoenzngeungeu, daxmeh vih neix mbouj noix caeuq daxboh doxceng, couh dwg yienghneix, daxboh moix ngoenz ciuqyiengh “hoenzien mbouj gat”.

Ngoenz ndeu gou cuengqhag ma ranz, ngamq haeuj dou daxboh couh heuh dawz gou, heuh gou bae bang de cawx ien, mwhde, daxmeh ganjgip oknaj lanz gou. Gou riu dwk doiq daxmeh naeuz: “Meh, mbouj miz maz law, cit ien mbouj miz maz vaihcawq ya, dauqfanj lij miz mbouj noix ndeicawq ne.”“Mbouj ndaej luenh gangj, gaej hawj daxboh daiq vaih mwngz lo.” Daxmeh gig yiemz doiq gou naeuz, daxboh raen gou ndwn youq mbiengj de, daekeiq raixcaix.

Gou yawj dwk daxboh, mbouj gaenj mbouj menh naeuz: “Mbouj loek ha, ndeicawq citien miz sam fuengmienh: Daih’it, duz ma raen bouxcitien couh lau, couh deuzbae; daihngeih, bouxcaeg mbouj gamj haeuj ranz bouxcitien caeg doxgaiq; daihsam, bouxcitien engqgya ndangcangq baenz coz.” Dingq gij vah gou le, daxmeh doeksaet dwk aj bak ngabngab, daxboh hix ngunhngwd lo, yungh lwgda cim yawj dwk gou. Gou ciep dwk naeuz: “Daih’it, bouxcitien dingzlai laeng goz, duz ma baez raen couh laihnaeuz de cingq gip aeu gyaeujcien moeb de ne, de mbouj lau ha?” Daxboh saeknaj de gig doeksaet. “Daihngeih, bouxcitien gyanghwnz ae lai, bouxcaeg laihnaeuz de caengz ninzndaek, ndigah mbouj gamj haeujbae caeg.” Mwhde daxmeh riugan yawj dwk daxboh. “Daihsam, gingciengz citien saeknaj ndaemndwt, ciengzciengz hawj vunz roxnyinh de ndangcangq, yienhndaej nienzcoz.” Daxboh daej riu mbouj baenz, daxmeh engq dwg got dungx riuhaha, daxboh anjwt naeuz: “Dahniq, seizneix majhung lo, hag daxmeh mwngz guh ‘yindung gimqien’ lobw.”

Gvaqlaeng, daxboh citien yied daeuj yied noix lo.

(Gyanghsuh Gauhyouz Vaigozyij Yozyau Sigijfungh Vwnzyozse Vang Sih)