Duj fwzhau ndeu mbin ha mbin, de siengj ra aen ranz ndeu ciengxlwenx youq gizde.

De ra daengz go faex sangswd ndeu, ngamq siengj venj youq gwnz byaifaex, couh mbin daeuj duz roeggacak ndeu. De doiq fwjhau naeuz: “A, mwngz caen lumj ndaek faiq ndeu, itdingh gig unq ba, gou gamz mwngz ma ranz, hawj gou guh denz ba!” Gangj dwk, couh mbin gvaqdaeuj, siengj gamz de bae.

Yienghneix, fwjhau vaiqvet mbin bae lo.

De mbin gvaq goengq youh goengq bya sang, gwnz bya roeg rwenz va hom, hoengheiq singjsien. Fwjhau ngamq siengj venj youq dingjbya, couh buet daeuj sam duz lingz. Miz duz lingz ndeu naeuz: “Vaiq yawj, de geijlai lumj ndaek dangzfaiq ndeu ha! Dou bae gaeb aeu de, cimzcimz van mbouj van!” Vah ngamq gangj sat, sam duz lingz couh coemj hwnjbae.

Yienghneix, fwjhau caiq baez deuzbae lo.

De mbin gvaq doengh naz ndeu, yawjraen boux canghdajveh iq ndeu cingq dajveh. Gwnz veh miz nazmeg、 miz dujva 、miz dah iq、miz giuz iq, hoeng mbouj miz fwjhau gwnzmbwn. Yienghneix, fwjhau couh mbin haeuj fukveh de bae, fukveh bienq ndaej engqgya gyaeundei lo.

Mwhde, lauxsae byaij gvaq- daeuj, haenh de veh ndaej ndei, daegbied dwg duj fwjhau haenx, caen ndeiyawj. Canghdajveh iq ndaej haenh le, ndawsim angq raixcaix.

Fwjhau hix gig angq, aenvih de ra daengz aen ranz gyaeundei de lo.

(Sanhdungh Swngj Gauh- cingh Yen Gauhcwngz Cin Fanz- linz Siuyoz Mung Swjyauz)