Singhgiz haj mwh cuengqhag, daxbuz lumj bingzseiz nei daeuj ciep gou.

De itmienh bek aenmbaq gou itmienh angq dwk naeuz: “Mwngz rox lwi, daxgoeng ngoenzneix aeundaej mbawgaj gunghgyauh gingqlaux lo, de gvaqlaeng naengh ci couh mbouj yungh cawx fei lo.”“Ndei lai lo, daxgoeng naengh ci bae caeuq baengzyoux guhcaemz couh mbouj lau lumz daiq cienz lo!” Gou naeuz.

“Goeng mwngz ngoenzneix youq ranz cawj haeux ne.” Daxbuz naeuz, “Mwngz ngoenzneix couh dawz mbawgaj gingqlaux daxgoeng daeuj naengh ci ndaej lo. Neix dwg mbawgaj gyauhdungh gou, neix dwg mbawgaj gingqlaux daxgoeng, cuengq youq doxcaez, gou hwnj ci gonq, mwngz youq baihlaeng cat gaj, swhgih yawj mbouj raen law.” Gangj le daxbuz couh dawz mbawgaj gingqlaux daxgoeng caeuq mbawgaj gyauhdungh de caez oet hawj gou.

Gou dawz song mbaw gaj neix, hainduj yaemhywx lo: Gou wng mbouj wnggai yungh mbawgaj daxgoeng ne, gou mbouj wnggai yungh, bingzseiz lauxsae mbouj dwg itcig son dou yaek guh boux vunz lauxsaed ndeu ha? Siengj daengz gijneix, gou dawz mbawgaj gingqlaux daxgoeng ndenq hawj daxbuz naeuz: “Yienghneix guh mbouj ndei ba.” Daxbuz youh oet hawj gou, daengx gou mbat ndeu naeuz: “Mbouj danggya mbouj rox fwnz haeux youz gyu bengz, naengh baez ci ndeu noix gyau song maenz ngaenz, ndwen ndeu ndaej mbaet roengz mbouj noix ne.” Gou cij ndei dawz song mbaw gaj neix gaem youq ndaw fwngz, hoeng roxnyinh song mbaw gaj neix sawqmwh bienq ndaej gig ndaek, gou dawz de gig mbouj cwxcaih.

Gvaq yaep ndeu, cigunghgyauh daeuj lo, dou hwnj ci le, daxbuz lij sing iq doiq gou naeuz: “Geiq ndaej cat mbawgaj daxgoeng bw.”

Mwh cawx fei, gou cat mbawgaj gyauhdungh daxbuz gonq, mwh ngamq siengj dawz mbawgaj gingqlaux daxgoeng okdaeuj, naj gou fwt ndat- fwdfwd—— mbouj ndaej dam bienzngeiz bienq- baenz boux mbouj lauxsaed mbouj soujsaenq ndeu ha. Yienghneix, gou dawz mbawgaj gingqlaux vaiqvet cuengq haeuj daeh bae, dawz song maenz ngaenz okdaeuj, cuengq haeuj aensieng coux ngaenz bae. Daxbuz raen le, bwnda nyaeuq lo, mboujgvaq gvaq yaep ndeu, bwnda nyaeuq haenx youh mbe bingz lo, got gou ndaetndaet youq henz ndang.

Ci menhmenh hai bae, gou yawj funghgingj daj henz cueng gvaqbae haenx, yienhndaej daegbied gyaeundei, sing duz roeg hemq haenx hix lumjbaenz daegbied ndeidingq.

Baez senjcwz neix, gou guh deng lo. Guh boux vunz lauxsaed soujsaenq ndeu, mbouj dwg gig angq ha?

(Sanghaij Swhfan Dayoz Fusuz Vaigozyij Siujyoz haj nienzgaep Cangh Cuhhau)