Seizcin vadauz nding goliux heu, seizhah gofaex mbwncup heuyau, seizcou gva mak homfwd, caen gyaeu! Sawqmwh miz ngoenz ndeu, gou raen seizdoeng hix miz gingjsaek hawj vunz haeujmaez.

Ganjfaex seizdoeng couh gig miz eiqsei. Yienznaeuz mbaw loenq liux lo, yienhndaej gyaxgedged, hoeng de ciuqyiengh dasang daengjsoh hwnj gyangmbwn. Mwngz danghnaeuz sij- saeq cazyawj, itdingh raen gij gyaeu de. Yawj, sojmiz ngafaex doxsan doxgeuj youq doxcaez, baenz gij yiengh geizgeiz gvaiqgvaiq, miz mbangj lumj cihmeh Y, miz mbangj lumj cihmeh A, lij miz mbangj lumj fuk vehraemxmaeg gyaeundei ndeu. Neix dwg mwh gofaex mbwncup heuyau yawj mbouj daengz gij gyaeu haenx ne!

Nae seizdoeng couh engq gyaeu lo! Vanae daengx mbwn mbinfengfeng lumj fouzsoq duz cinglingz nei mbin dwk, baenq dwk. Gyoengqde dwg geijlai lingzlaeux, geijlai seuqcengh. Nae hung gvaq le, gwnz faex、gwnz ranz、gwnz diegnywj cungj lumj bu hwnj caengz damjbwnyiengz nanwt、unqnem nei, daengx aen biengz cungj dwg hausagsag.

Caenhguenj seizdoeng nitcat, hoeng cingqsoq miz gij gyaeu daegbied de.

(Gyanghsuh Swngj Suzcenh Si Vwnzcangh Siujyoz ngeih (1) ban Fungh Ginjsenh)