Gyanghwnz lo. Ndaw siujgih nauhyied ngoenz ndeu haenx caemdingh roengzdaeuj lo, lohdaeng menhmenh ciuq ok gij rongh damhdamh de, daeng geij ranz vunz hix gaenq ndaep lo, lumj cingq cienz ok singgyaen onjwt.

Gou lij naengh youq naj daizsaw, aen uk cix yied daeuj yied ngwnh. Yawj diuz daez suyoz sawq yungh haujlai cungj fuengfap daeuj gej hix gej mbouj ok de, sim gou yied daeuj yied luenh, lwgda hix yied daeuj yied mong.

Daxboh yaengyaeng nyoengx aen dou, byaij haeujdaeuj, ndenq hawj gou geij dip mak- bugnding. Noh makbug ronghcingx deng naeng buenq ronghcingx duk dwk, youq rongh daeng henjdamh ciuq baihlaj, ndeiyawj raixcaix. Gou iet fwngz bae ciepaeu, lwgda fouzeiq yawj seizgan gwnz aen cung, yienghneix gou youh suk fwngz dauqma, lwgda dauq yawj bonjsaw.

Daxboh aiq dwg rox gou mbouj nyienh dawz seizgan yungh daeuj mbiq naeng dip makbug ba, couh yaengyaeng byaij okbae. Yaep ndeu, daxboh youh laeglemx byaij haeujdaeuj, ndaw fwngz dawz aen vanj hau ndeu, naengh henz ndang gou.

Gou yungh gok da yawjraen, daxboh cingq mbiq naeng makbug hawj gou. De aeu ribfwngz siujsim yupyup youq gwnz naeng dip makbug buenq ronghcingx haenx veh ok loh he, caiq yaengyaeng dawz naeng mbangmbi mbiq coh song mbiengj. Noh makbug saek damhnding loh okdaeuj, baenz naed baenz naed, baiz ndaej cingjcingj caezcaez, bizbwd ronghcingx. Daxboh yungh lwgfwngz yaengyaeng dingj mbat he, noh makbug couh lot roengzdaeuj. Daxboh youh mbiq baenz hung iq habngamj, cuengq haeuj vanjhau bae. “Gwn ba.” Daxboh naeuz.

Noh makbug ndingdamh ronghcingx ingj youq gwnz bangx vanj, lumj boux canghveh veh okdaeuj ndei, ndeiyawj dangqmaz. Gou iet fwngz aeu nyeuq ndeu, cix yawjraen ingj youq gwnz bangx vanj haenx, lij miz gij doxgaiq haujsausau……

Gou nyaenx mbouj ndaej yawj coh daxboh. De sej lwgda, sijsaeq mbip caengz naeng baihlaj noh makbug. Naeng baihlaj makbug gaenjgaenj lienz dwk caengz noh makbug he, aeu geij naed geij naed, caemhcaiq baenz naed baenz naed mbip roengzdaeuj. Daxboh mbouj gip mbouj vueng, sijsaeq mbiq dwk. Gvaq yaep ndeu, noh makbug mbip roengzdaeuj liux lo, daxboh dawz naeng dip makbug cuengq youq henzde. Gou yawj gvaqbae, fwt roxnyinh lumj byoemhau daxboh nei. Mbouj rox seizlawz, byoemhau gaenq raih hwnj gwnz gyaeuj daxboh, vanzlij gig lai dem.

Daxboh youh aeu dip mak he, naengh soh aen hwet, aeu mbiengj gaemxgienz he yaengyaeng dub aen hwet. Raen gou ngawzngwd yawj de, daxboh riuriu naeuz: “Gwn ba.”

Gou dawz makbug cuengq haeuj bak bae—— itdingh dwg gou gwn gij makbug caengz gwn gvaq haenx ba, liengzsisi, van- subsub, raemx lai raeuh. “Dida”, ndik raemxda he doek gwnz bonj cozyez gou. Gou ganjvaiq aeu fwngz goemq dwk, lauheiq daxboh yawjraen.

Daxboh laebdaeb ciensim mbiq makbug. Gou cix fwt cingsingj lo, diuz daez suyoz laengz gou haujlai nanz haenx, sawqmwh miz fuengfap gej lo.

Makbug haemhde, liengzsisi, hix raeuj- rubrub.

(Anhveih Swngj Cenzsanh Si Daihsam cunghyoz Liuz Sinmuz)