Gaxgonq, diuz loh iq najranz gaebgeb、gumzgumz gamxgamx. Riengz dwk seizgan bienqvaq, loh iq bingz lo, gvangq lo. Gou cingq majhung, loh iq hix majhung……

Mwh sam nienzgaep, gou ngamq hag rox gwih danci, gwn haeuxngaiz le couh bouxdog gag laeglemx okdou lo. Gou gwih ci youq gwnz diuz loh najranz gumzgumz gamxgamx haenx, caekhaex mbouj dingz youq gwnz daengqci naengh roengz daenh hwnj. Caenhguenj caekhaex deng daenh ndaej in raixcaix, hoeng di ndeu cungj mbouj yingjyangj daengz simcingz ndei gwih ci gou, lienz baihnaj miz gumz raemx ndeu cungj yawj mbouj raen, loekci baihnaj cung roengz gumz raemx bae, gou lienz vunz daiq ci laemx roengz lo. Fwt deng laemx roengz hawj gou doeksaet liux, gou gingqyienz lumz in lo, benz hwnjdaeuj ganjvaiq bae yawj gyaqci deng vaih caengz, lij ndei. Gou soeng gaemz heiq ndeu, gaex danci ma ranz, itmienh byaij itmienh damz: “Gijmaz loh ha, gumzgumz gamxgamx, haih gou deng laemx.”

Mbouj gvaq geij nanz, daeuj le haujlai boh’au coih loh, loh iq hainduj nauhyied lo. Gumz gwnz loh deng gyoengqde dienz bingz, loh iq bu hwnj suijniz. Ca mbouj lai buenq bi seizgan, loh iq fatseng bienqvaq gig hung, bienqbaenz diuz loh bingzbwd、gvangqlangh ndeu. Loh iq hawj daihgya gwndaenj daiq daeuj fuengbienh, caezgya ndawsim cungj angq lumj va hai nei!

Youq ndaw hagdangz, gou yaek laebdaeb roengzrengz doegsaw, ceng’aeu cinbu engq hung, caeuq loh iq doxcaez majhung!

(Hoznanz Sihyaz Yenz Yangzcwngz Cin Cunghsinh Siujyoz Du Bungzyenz)