Yaek daengz cieng lo, gou caeuq daxboh daxmeh bae cauhsi cawx nienzhuq, gou mbouj rox geijlai angq ha!

Dou daeujdaengz cauhsi, raq “feihnienz” he coemj haeuj naj daeuj, gizgiz cungj dwg “nding Cungguek”, bakdou cauhsi venj miz daengloengz nding, song mbiengj bakdou nem doi nding- yanyan, lij miz cih “fuk” ndinghenj, giet Cungguek ndinghoengz, caen gyaeundei! 

Ndaw cauhsi vunz lai vunz daih, nauhyied raixcaix. Gou caeuq daxboh dangq vunz dangq doi aen ci iq ndeu, caenx youq ndaw vunzlai dwgrengz byaij dwk. Yawj gij saenzcingz angqyangz vunzlai, gou hix nyaenx mbouj ndaej riu lo. Ndaw cauhsi doxgaiq yienghyiengh cungj miz, cien gaiq fanh yiengh, hawj gou yawj ndaej dava liux.

Dou hainduj genj cawx nienzhuq lo. Gou caeuq daxmeh haeuj giz gai gijgwn bae, daxboh gag bae gizwnq. Gou cawx le baulaihleix, caengh le cehgva、duhnamh、dangz、bingj daengj. Byaij daengz giz gai gijgwn lwgnyez, va, baenzlai gojdung! Gij yiengh gojdung gak cungj gak yiengh ciuyinx dwk gou: Miz yiengh doenghduz、cihmeh、hajgaksing, lij miz gij yiengh gak cungj mak. Feihdauh hix miz haujlai cungj: Miz feih makbingzgoj、makdumh、makgyoij、cijvaiz daengj. Gou yienghyiengh cungj siengj aeu, ganjgip dawz daeh daeuj coux daeh hung rimrim he. Mwhde, daxboh hix doi ci coux rim byaek、laeuj、yinjliu caeuq mak he gvaqdaeuj lo. Gou fwt siengj hwnj caengz cawx mbaw “fuk” ne, yienghneix dou youh genj le geij mbaw cih “fuk” gyaeundei, gou gaemdawz mbaw cih “fuk”, roxnyinh gig vuenyungz!

Youq gwnz loh ma ranz, gou siengj dwk: Cingqdwg aenvih guekcoj ngoenz beij ngoenz maenh- ak, raeuz cij miz aencieng gawq bingzonj youh naengq he, gou caen- sim maqmuengh youq ndaw bimoq neix, hawj engq lai saehndei heux youq henz ndang moix boux vunz! Hawj daihgya ngoenzngoenz cungj najriu vuenyungz!

(Mungz Yen)