Ngoenzneix dwg ngoenzndaep, dwg ngoenz doiq vunz Cungguek daeuj gangj ngoenz youqgaenj ndeu.

Gyanghaet, gou caeuq daxboh daxmeh caeuxcaeux couh ganj bae ranz yahdaiq lajmbanj. Gvaqcieng lo, gizgiz cungj dwg gingjsaek angqyangz. Ranzranz cungj nem doiq lo, song mbiengj gai cungj venj daeng- loengz baek geiz hoengzhoengz henjhenj, gyoengq lwgnyez youq gyang gai faengzfwd guhcaemz, vunzlai hix daenj hwnj buhmoq, miz gangj miz riu, daihgya cungj caem youq ndaw ngoenzciet angqyangz.

Gvaqcieng lo, ceiq vuenyungz cungj beij mbouj gvaq gwn haeux doxcomz lo.

Banringz, yahdaiq caeuq daxmeh nyaengq dwk cawj haeux cawj byaek, daengx aen ranzdajcawj cungj dwg feih homfwd, gou youq ndaw ding cwxcaih gwn cehgva、gwn dangz gwn mak、yawj densi, dangyienz lij seiz mbouj seiz bae ranzdajcawj “caeg” di ndei gwn daeuj gwn.

Gwn caeuz lo! Gak cungj gak yiengh byaek homfwd baij rim daiz, gou myaiz cungj rih lo.

“Gwnhaeux lo!” Gou ciengj gonq dawz hwnj boi yinjliu ndeu sing hung naeuz: “Hoh daihgya bimoq angqyangz, siengj maz ndaej maz, saehsaeh swnhsim!”

Daxboh hix mbouj gamsim doeklaeng, ndwn hwnjdaeuj naeuz:“Hoh daihgya guhhong swnhleih, ndangdaej maenghcangq, miz fuk habhoz!”Goengda、yahdaiq、daxmeh hix baenbied gangj vah hohfuk. Dou dox bungq boi, dawz hohfuk caeuq caencingz rimcang- cang cungj yungz youq ndaw boi laeuj caeuq ndaw boi yinjliu, doxcienz gij gyaez caeuq caencingz.

Gvaqcieng lo! Gij saeh ceiq yinx couh dwg yawj ndwencieng lienzvuen vanjvei lo.

Ndwencieng lienzvuen vanjvei dwg banhaemh bet diemj cingq hainduj. Lij caengz daengz bet diemj, dou daengx ranz vunz cungj caj mbouj gib naengh youq naj densi lo. Bet diemj cingq, vanjvei hainduj lo. Gwnz vujdaiz daeng ronghsag, bouxcujciz daenj buh gyaeundei, yiedcingz angqyangz; lajdaiz bouxyawj comzyouq doxcaez, naj riunyangz- nyangz. Dou yawj le siujbinj、ciengqgo diuqfoux、fapswd、siengsingh、ciengqheiq、goengfou、cazgi daengj cezmuz. Moix aen cezmuz cungj ndeiyawj raixcaix. Siujbinj biujyienj daeuq ndaej dou riuhaha.

Mbouj rox mbouj nyinh, aen cung gyanghwnz cibngeih diemj yiengj lo. Youq ndaw bauqienva saek rongh yiengh lai caeuq sing bauqrengh mwngz yiengj gou dingz, dou angqangq yangzyangz coux daeuj bimoq lo.

Youh mwh sing cung cibngeih diemj yiengj mbatde, gou laeglemx wngqcingz song aen simnyienh: It nyienh ranz gou bouxboux ndangcangq, guhhong swnhleih, haeujok bingzonj; ngeih nyienh ndaw bimoq gou roengzrengz doegsaw, hagsib cinbu!

Gvaqcieng lo! Gou youh majhung bi ndeu lo!

(seiq nienzgaep Cangh Yizvwnz)