Haemhndaep dwg nauhyied dangqmaz. Mwngz yawj, gou caeuq vunz ndaw ranz cingq youq ndaw ranzdajcawj nyaengq cawj haeux haemhndaep. Goengda aeu geij aen gyaeqgaeq, sugsed guh gienjgyaeq, de dawz gyaeq raix roengz rek bae, lij mbouj lumz daeuq gou；“Mwngz yawj de, lumj mbouj lumj aen najhung mwngz?” Nyex ndaej dou cungj riuhaha. Gou cingq caeuq yahdaiq hag guh nyiengh douhfouh, gou laeglemx dawz naed ngaenzdih ndeu cuengq haeuj ndaw douhfouh bae, deng yahdaiq yawjraen lo, de riuhehe naeuz: “Mwngz baenz bw, lij hag laeglemx cuengq ngaenz ne!”

Gwn caeuz lo. Dou dawz byaek cungj baij hwnj daiz bae, gyoengq caencik hix laebdaeb haeuj ranz daeuj, ndaw ranz yied daeuj yied nauhyied lo, daihgya mbouj dingz gangjgangj riuriu. Ceiq angq cou dwg goeng’au gou lo, de cungj rox gangj di vahriu geizheih noix miz haenx, daeuq ndaej daihgya cungj riu ndaej naengh mbouj soh lo. Gyoengq caencik hix cam gou di vwndiz diuqgah ndeu, mwhde gou couh bienqbaenz boux gangj siengsingh ndeu, yungh vahriu daeuj hoizdap gyoengqde, daihgya cungj deng gou daeuq ndaej raemxda rih okdaeuj lo, gwnz daizbyaek feih gvaqcieng engq haenq lo.

Haemhndaep dwg ndaw bi ndeu ngoenz ceiq nauhyied ndeu, youq ndaw sing angq sing riu, doxcienz haenx dwg caencingz raeujrub, gangjok haenx dwg doiq daengzcog maqmuengh.

(Gvangjdungh Swngj Cuhhaij Si Yanghcouh Gih Daihcib’it Siujyoz Vangz Gojsinh)