Banhaet daengngoenz rongh- sag, raq rumz he ci gvaq, hoengheiq singjsien sawj vunz sangjswt. Hag- dangz gawjbanh doxciep doxdax, daengxcungq lauxsae hagseng daeujdaengz ndaw cauhcangz, naengh youq diegnaengh gak ban yawj doxdax. Sing gvangjbo、sing cungqfatlingh hainduj、sing lah- lahdui, singsing haeuj rwz, sawj vunj angqfaengz, sawj vunz gaenj- cieng youh gikdoengh.

Lwnz daengz yindungyenz ban dou hwnj ciengz lo. Riengz dwk sing cungqfatlingh hainduj yiengj, ban dou boux buet daih’it lumj duzbeuq nei cung baenaj. De ok rengz buet dwk, sim gou hix riengz sing din buet de diuqbubbub. Cij raen de mauhgvaq geij boux yindungyenz doih wnq, dawz faexgyaengh doxciep swnhdangq ndenq hawj boux buet daihngeih ban dou. “Ngeih nienz bet ban gyayouz!” Riengz dwk sing hemq doengzhag, boux yindungyenz buet daihngeih hix lumj gaiqnaq liz gung nei mbin baenaj. Sawqmwh, faexgyaengh ndaw fwngz de mbouj siujsim doek lo, cienz ciengz doengzhag cungj sim gaenjgwk yawj de, hoengheiq sawqmwh lumj gietndangj nei. Cij raen de nyaeuqnyaeuq bwnda, gip hwnj gaiq faexgyaengh doxciep, haeb- heuj laebdaeb buet baenaj. Yienz- naeuz okyienh cingzgvang loeklak, hoeng youq yindungyenz doxciep ban dou dox boiqhab lajde, gyoengqde gyaep hwnj geij boux yindungyenz ban wnq, vanzlij beij gyoengqde cung gvaq diuzsienq satbyai gonq.

Doxgiet couh dwg rengzhung, ciengzmienh doxciep doxdax ciengz youq ndaw uk gou okyienh. Vunzlai ciengz gangj “gaiq sei dog mbouj baen cag, go faex dog mbouj baenz ndoeng”, doenggvaq baez doxciep doxdax neix, gou engqgya rox aen dauhleix neix lo.

(Liuzningz Swngj Anhsanh Si Haijcwngz Si Sihgvanh Siujyoz ngeih nienzgaep Vangz Gizhau)