Laeng ranz gou miz benq diegnywj heuyauyau he, gizde dwg gizdieg mwh iq gou caeuq dahcej langh yiengz haenx.

Vaiqhaemh seizhah dwg mwh duz yiengz gwn nywj ceiq angq haenx. Mwngz yawj! Gij yiengz ciensim gwn nywj de, lauheiq deihsaenq 9.8 gaep cungj saenq mbouj lau de ba? Gyoengq yiengz bak dep go nywj, aen ndaeng mbouj dingz mup dwk, sijsaeq nyinh go lawz miz doeg, go lawz ndeigwn. Aen bak raez de baez nyeng baez nyeng, mwh aj bak, mumh laj hangz caeuq nywj oiq cab youq doxcaez, caen yousim de dawz mumh caeuq nywj caez gwn haeuj bak bae. Mboujgvaq gou raen gij yousim gou dwg laiyawz lo.

Duz yiengz dwg yienghhaenx mbouj lau baeg mbouj dingz nyaij- vumvum. Gwn nywj sat le, gyoengq yiengz youq ndaw rumz liengz banhaemh ninz roengz hoizcauj. Ragnywj caeuq ganjnywj caengz siuswg haenx, mwhde caiq dauqhoiz ndaw bak, menhmenh nyaij……

Yiengz gwn nywj caen mizyinx, hawj gou siengj daengz dou bingzseiz hag cihsiz. Youq ndaw hagsib, raeuz ndaej mbouj ndaej lumj yiengz gwn nywj nei ciensim ne? Ndaej mbouj ndaej nyinh ndaej go nywj miz doeg caeuq go ndeigwn ne? Daegbied dwg cungj cingsaenz yiengz gwn nywj mbouj mbwq mbouj naet haenx, youq ndaw hagsib raeuz guh mbouj guh ndaej daengz ne? Doiq cihsiz caengz siuswg lijgaij de, dwg mbouj dwg ciengz “hoizcauj” lone?

Youq ndaw hagsib, raeuz gizsaed caeuq yiengz cengca lai lo. Hwnjdangz mbouj haeujsim dingq, cungj siengj roengzdangz vaiq di bae guhcaemz; doiq gij daez hwnjdangz dingq mbouj rox de, cungj dwg doiq swhgeij naeuz, caj yaep ndeu bae cam lauxsae roxnaeuz doengzhag, hoeng moix baez cungj dwg vah daengz gokbak, cungj mbouj gangj okdaeuj; mwh cingzcik gaujsi okdaeuj, cungj aeu “caeklaiq gou mbouj dwg gauj ndaej ceiq yaez” guh gyaijbak yienzliengz swhgeij.

Danghnaeuz raeuz youq ndaw hagsib hix lumj yiengz gwn nywj ityiengh, lij miz gijmaz hag mbouj ndei ne?

(Cungzging Si Vancouh Gih Bwzanh Yizmiz Siujyoz haj nienz- gaep Siuh Dingz)