Haenx dwg roek nienzgaep bizyez ndwen gaxgonq, suyoz lauxsae vuenh gou daengz henz Yijgez bae naengh. Gvendaengz gij cienzgangj de miz haujlai, miz mbangj vunz naeuz singqcingz de mbouj ndei, cingzcik ca, maj ndaej hix mbouj ndeiyawj, youq neix gaxgonq gou caen mbouj roxyiuj de, couh laihnaeuz dwg caen, ndawsim gig mbouj cingznyienh. Lauxsae heuh dou vuenh diegnaengh, mboujgvaq dwg vihliux fujdauj hagsib, gaxgonq cungj saeh neix hix mbouj noix, hoeng baezneix caen miz di nanz ciepsouh.

Siengj mbouj daengz dwg, caeuq de baedauq song ngoenz le, gou raen de gizsaed hix mbouj ca, hag ndaej hix haemq vaiq, couh dwg gij vwndiz gihcuj mbouj maenh, lij miz di daihlawq. Mwhde gou roxnyinh daengz, neix lumjbaenz hix suenq dwg faenh hong ndei ndeu. Dauqdaej lij miz ndwen seizgan ndeu, seizgan gaenj, gou caeuq de doxaeu le haumaj dienhvah. Banhaemh cuengqhag le mwh ca mbouj lai roek diemj buenq, couh dwk dienhvah gangjgoj gangj daezmoeg. Doeklaeng ok daez hawj de, ngoenz daihngeih baehag le caiq yawj de guh ndaej deng mbouj deng. Mbouj geij nanz, aenvih cozyez daiq lai, couh cij gangj cozyez lo.

Doeklaeng miz ngoenzsinghgiz ndeu, dou doxcaez bae yawjsaw, mwh dauqma, gangj dwk gangj dwk, sawqmwh couh dingqnyi de cam aen vwndiz ndeu:“Gou dauqdaej vih gijmaz hagsib ne?” Ciepdwk de youh gangj “Lauxsae cungj naeuz yaek vih gij loqsiengj swhgeij bae roengzrengz, hoeng gou mbouj rox loqsiengj gou dauqdaej dwg gijmaz.” Gizsaed de cam aen vwndiz neix, gou hix mbouj rox baenzlawz hoizdap de, mwhde daihgaiq dwg aeu gwnz saw swhsiengj binjdwz gangj haenx daeuj hoizdap ba.

Liz gaujsi seizgan lij miz doeklaeng aen singhgiz ndeu, cingzcik de ciemhciemh daezsang, seiz mbouj seiz ndaej lauxsae haenh, saekseiz lauxsae hix daez daengz gou. Gou hix vih de angq, hoeng mbouj rox vih gijmaz, ndawsim cungj miz aen sing ndeu doiq gou naeuz: “Neix mbouj gven gou maz saeh, cungj dwg de swhgeij roengzrengz.

Doeklaeng, daengz bizyez gaujsi lo. Mwh yawj daezmoeg, gou cungj yousim de miz gizlawz mbouj rox. “Aeu saenq de, aeu saenq de.” Gou doiq swhgeij naeuz.

Doeklaeng mwh rox cingzcik, de umj gou youh saet youh diuq, angq raixcaix, naeuz neix dwg de gauj ndaej baez ceiq ndei ndeu. Yawjraen de baenzneix angqfaengz, gou lumj ndaej gwn dangzrwi nei, roxnyinh beij swhgeij cinbu lij angq.

Baezde, gou caen angq!

(Swconh Swngj Luzcouh Si Daih Cibhaj Cunghyozyau caet nienzgaep Vangz Yenzsinh)