Ngoenzneix mbwn gvengqcangcang, rumz liengz cififi, ndit raeujrub cik aen daihdeih, gou caeuq daxmeh angqvauvau bae bin bya. Ngamq hainduj, gou rengzrwdrwd, sam yamq guh song yamq, it loh buet dwk, gig vaiq couh buet daengz baihnaj, gou ciengq dwk go, lij seiz mbouj seiz nyeux gyaeuj gvaqdaeuj, sing hung coi daxmeh doeklaeng gou haenx vaiq di byaij.

Gou gig vaiq couh daeujdaengz byongh bya, seizde gou naiqnuknuk, hanh lae hanh roenx, baeg dwk gou saeg naengh youq gwnz mbaek laerin, buh dumz hanh haenx nem youq raeblaeng gou gig hoj youq. Mwh gou cingq siengj doiqdauq, aen ngaeuz iqet he daj henz ndang gou byaij gvaq, haenx dwg boux lwgnyez daihgaiq seiq bi he, de naj ndingfwdfwd, haeb heuj byaij coh dingj bya. Yaep de gik hwnj gij ceng sawhingz gou, gou ndwn hwnjdaeuj, swnh ndat dub diet, hix buet coh dingj bya.

Daengz dingj bya le, raq rumz liengz he ci daeuj, liengzsisi, cwxcaih lai lo! Gou ngaem gyaeuj yawj daihdeih, yawjraen laeuzsang daj lajdeih soengz hwnj, yawjraen diuz dah lumj duz lungz raez nei gvaengxgvax youq gyang singz, geijlai ndeiyawj ha!

Baez bin bya neix hawj gou roxyiuj, cijaeu itcig cungj guh, mbouj lau dwgrengz, couh miz soundaej!

(seiq nienzgaep Cinz Cozdenh)