Ngoenz banhaet mbwn’gvengq rumz- liengz ndeu, daxboh daxmeh cungj bae hwnjban lo, gou boux dog gag youq ranz, hwnqcongz le gou swiqnaj cathenj sat, yawjraen gwnz daizgwnngaiz baij miz haeuxcaeux caeuq mbaw ceij daxmeh sij cih gwnzde ndeu, gwnz ceij sij naeuz: Gou caeuq boh mwngz miz saeh okbae, mwngz yaek nyinhcaen sij cozyez, gaej loengh dennauj bw.

Gwn sat haeuxcaeux, gou couh hainduj sij cozyez, sij daengz dingz ndeu, dienhvah yiengj lo, dwg baengzyoux ndei gou dwk daeuj, gou ngamq ciep dienhvah couh dingqnyi sing angqyangz de: “Gou cingq dwk youzhi, couh ceng mwngz lo, mwngz hix hwnjsienq ba!” Gou siengj hix mbouj siengj couh naeuz: “Ndei ha, gou sikhaek hai dennauj.” Cuengq roengz dienhvah, gou cung daengz naj dennauj, ngamq siengj hai dienh, seizde, fwt siengjhwnj vahdaengq daxmeh, caiqlix cozyez hix caengz sij sat. Gou yaemhywx lo, ndawsim miz song aen sing doxgangj. Ndawde miz aen sing ndeu ganvad naeuz: “Loengh yaep ndeu ba, fanjcingq daxboh daxmeh youh mbouj youq ranz, mwngz mbouj gangj gyoengqde couh mbouj roxyiuj.” Hoeng lingh aen sing buek naeuz: “Cozyez caengz guh sat couh mbouj ndaej loengh dennauj, yaek guh boux lwgnyez ndei lauxsaed ndeu.” Baenzlawz guh ne? Gou gig aengjgyaengj, mbiengj he dwg dapwngq gij iugouz daxmeh, mbiengj he dwg dapwngq baengzyoux loengh dennauj. Doeklaeng gou guh aen gietdingh he, guh sat gij wngqcingz daxmeh. Gou dwk dienhvah hawj baengzyoux ndei gou, naeuz gou lijmiz cozyez caengz sij sat, mbouj dwk youzhi lo.”“Gou miz di boiqfug mwngz lo. Cozyez gou hix caengz sij sat, gou hix bae sij cozyez gonq ba.” Baihhaenx cienz daeuj sing baengzyoux gou.

Sij sat cozyez mbatde, gou roxnyinh daengz gou lumj vaiz duet ek nei, yaepde gou roxnyinh swhgeij majhung lo, gou hag rox gag hanhhaed bonjfaenh lo.

(sam nienzgaep Hij Meij Giz)