“Bingjva’gviq, gai bingjva’gviq lo!”

Youq geiqciet va’gviq homfwdfwd, dahniq daenj vunjhau fwngz venj aen swx, ndwn youq henz gai ci lai vunz hoengh haenx, sing hung hemq dwk. Ndaw swx mbumjgyumq cienz daeuj geu hom feihva’gviq ndeu, lumjbaenz lij gap miz di feihvan, iemq haeuj sim vunz bae, dawz gou daiq ma daengz seiz lwgnyez……

“Daiq, daiq, va’gviq laengranz hai va lo, hom lai bw!” Gou beng gokbuh yahdaiq, rag de daengz laengranz, vix va’gviq henjrwg hai rim gwnz go va’gviq haenx, angq dwk diuqliklik naeuz: “Daiq, gou siengj gwn bingjva’gviq!”

“Ndei! Daiq guh hawj mwngz gwn!” Yahdaiq riu dwk han gou, lienz nyaeuq gokda de hix daiq miz unqswnh.

Yahdaiq riuj aen swx bae ngauq va’gviq. Va’gviq gig iq, lumj baenz aen baenz aen ndaundeiq iq, sieng rimz gwnz nye faex. Rumz ci gvaq, mbawfaex yiengjsasa, hawj hoengheiq gaenq miz damhdamh vahom haenx nyumx ndaej engq haenq lo, vahom coemj coh vunz, heiqhom mbin seiqlengq.

Yahdaiq aeu ndaej va’gviq le, ma daengz ranzdajcawj, mbouj geij nanz, de lumj boux canghfapswd nei bienq ok baenz aen baenz aen bingjva’gviq. “Guh ndei lo, lwg ngahgwn youq gizlawz ya?” Sing Yahdaiq ndeidingq raixcaix, gou lumj duz manaez dungxiek yawjraen lwgdouq nei, sam yamq guh song yamq coemj bae aeu bingjva’gviq ndaw fwngz yahdaiq.

Feihva’gviq homfwdfwd coemj haeuj ndaeng daeuj, gou caj mbouj gib dawz bingj cuengq haeuj bak bae, menhmenh nyaij, bingjva’gviq haeuj bak couh vaq, raeuzrwd unqnem, vandiemz habbak, van cix mbouj lawh. Danghnaeuz caiq boiq hwnj boi raemxmakmoiz yahdaiq cawj haenx couh engq ndei gwn lo.

“Daiq, mwngz hix gwn.” Yahdaiq riu naeuz: “Daiq mbouj gwn, mwngz gwn lai di.” Gou angqvauvau laebdaeb ngaem gyaeuj gwn, bingjva’gviq, buenx dwk vandiemz, dawz gij gyaez yahdaiq vaqbaenz geugeu cingz raeujrub, iemq haeuj ndawsim gou.

Doeklaeng, yahdaiq gvaqseiq lo. Va’gviq youh hai lo, hoeng gou caiq hix mbouj ndaej gwn bingjva’gviq yahdaiq guh haenx lo, caiq hix daejniemh mbouj daengz gij cingz raeujrub ndaw bingjva’gviq lo, hoeng cungj feihdauh vansubsub, gij cingz raeujrub de, gou ciuh vunz cungj mbouj lumz.

“Bingjva’gviq, gai bingjva’gviq lo!” Sing hemq dawz gou rag dauq yienhsaed. Din gou mbouj youz ndaej gou byaij coh dahniq gai bingjva’gviq haenx bae, “Hawj gou aen bingjva’gviq he ba!”

Ndawsim miz cungj maqmuengh he dawz bingj cuengq haeuj bak bae, dwg gij hom ndaejgeiq haenx, cix mbouj caiq dwg feihdauh ndaejgeiq haenx…… Youh dwg geiqciet hom feihva’gviq, gou caiq hix mbouj ndaej gwn bingjva’gviq yahdaiq guh haenx lo.

(Gvangjdungh Gvangjcouh Cidwz Cunghyoz gouj nienzgaep Linz Gojyinh)