Youq ndaw aen gangbya ndeu, ciengx miz duz byagim gyaeundei ndeu. Mwngz yawj, duz byagim saekraiz henj hau doxgek, gwnz ndang daenj geu vunjhau, gwnz hoz cug diuz gaenhoz henjnding ndeu, gyaeundei raixcaix.

Byagim ceiq maij ciuq gingq. De gag nyinhnaeuz de dwg duz bya lajbiengz ceiq gyaeundei ndeu, hoeng, gangj daeuj hix geizgvaiq, de soqlaiz mbouj ndaej vunz haenh gvaq, coenz he hix mbouj miz. De gig siengsim, nyinhnaeuz bouxwnq mbouj rox ngonzyawj gij gyaeundei de.

Miz ngoenz ndeu, byagim youh dawz gingq daeuj ciuq, sawqmwh, daj rog gang cienz daeuj coenz vah de gyaez dingq ndeu: “Ya, byagim geijlai gyaeundei ha!”

Byagim ngiengx gyaeuj yawj, laxlawz dwg duz meuz iq ndeu haenh de. Byagim gig gamjdoengh, cungj yaek daej lo, ganjvaiq naeuz: “Gyo’mbaiq mwngz, meuz iq!”

Meuz iq bibi fwngz, naeuz: “Mbouj yungh gyo- mbaiq, mwngz caen dwg gig gyaeundei. Danghnaeuz mwngz yat ok naj raemx, yienghneix couh engqgya gyaeundei lo.”

Byagim dingq vah duz meuz le, sikhaek yungh rengz daengx ndang, lumj byajmig nei yat ok gang daeuj.

Sawqmwh, aen bak hung ndeu haeb dawz aen ndang gyaeundei de, byagim laulili byaengq aen da de, yawjraen le mumh henz bak duz meuz.

Byagim daengz mwh dai mbat de cij rox, cienfanh mbouj ndaej cij dingq bouxwnq haenh cix lawq “fagmid” ndaw fwngz de.

(Cungzging Si Liengzbingz Yen Sizyen Siujyoz it nienzgaep Yangz Hanz)