Gou ceiq gyaez youq ranz yahdaiq youq. Gyanghaet mwh gou lij youq ndaw denz loq fangzhwnz, couh dingqnyi doufaex “bung- bang” yiengj sing ndeu, gou hai da baez yawj, laxlawz dwg duz mabwnyungz caeuq duz ma’ndaem! Song duzde baez haeuj rug daeuj, couh gvaengz aen mbonq gou cienq bae cienq dauq, yaep ndeu yawj gou, yaep ndeu youh boemz youq gwnz haiz gou vax geij mbat. Mbouj dwg hwnz ndeu mbouj raen, song duz ma neix couh siengj gou luba?

Gou ganjgip hwnqdaeuj daenj buh, caeuq song duz ma buet ok bakdou bae. Daengngoenz lij caengz loh aen naj de okdaeuj, gaeqboux hung gaenq hainduj guhhong lo, gyoengqde miz mbangj ndwn youq gwnz rin hung, miz mbangj ndwn youq gwnz goenqfaex, miz mbangj cienmonz mbin hwnj gwnz nyaqmeg sangswd bae, enjaek ngiengxgyaeuj ndiengqrieng, hemq “o o o” coh gyangmbwn, gij sing de goksadsad. Duz gaeqboux he daekeiq lai, nyex gij gaeqboux wnq doxcaez bae dot de, duz ak ndeu nanz dingj gyoengq gaeq ndeu, de cijndei yenjyakyak deuzbae lo. Duz gaeqboux ndeu roxnyinh gou najseng, gingqyienz mbin gvaqdaeuj dot caekhaex gou, gou diem din baez dik, de deng hwk ndaej deuz lo.

Duz bit caeuq duz hanq hix daeuj lo, gyoengqde hemq “ab’ab”, youq ndaw hongh buetlulu. Sawqmwh, duz hanqboux hung ndeu iet aen hoz raez de, dep deih vaiqvet coemj coh gou, hwk dwk gou hemq yahdaiq gouq- mingh.

Gwnz dieg gaeq bit hanq neix hwnj haenx roengz ciengq dwk go, roeggacak gwnz faex hix mbouj fug saw, “cica cica” hemq, gyoengqde hemq sam sing dingz mbat ndeu, gig miz cezcou ne! Baenz gyoengq baenz bang roeglaej ndwn youq gwnz faex doeng yawjyawj sae yawjyawj, deq miz seizgei couh mbin roengzdaeuj ciengj gijgwn gaeq bit hanq.

Ndaw mbanj ranzranz hoenzfeiz hwnj- neuneu. Yahdaiq itdingh cawj ndei gyaeqgaeq gyaeqbit caj gou ma gwn lo!

(Hoznanz Swngj Nanzyangz Si Youz- denz Daihhaj Siujyoz sam nienzgaep Bangz Bozcwngz)