Daihgya ndei! Gou dwg dahniq simvuen lingzlaeux dwggyaez ndeu, aen naj luenzlulu, lwgda mbouj hung cix gig mizsaenz. Gij gou ceiq daekeiq haenx couh dwg byoemgyaeuj gou lo, byoem gou youh co youh raez, ndaemndwt ronghlwenq, lumj caeuzndaem nei. Gou gig gyaez riu, mboujgvaq mwh daej couh mbouj dwggyaez geijlai lo.

Gou miz aen loqsiengj ndeu, couh dwg dang boux denhvwnzyozgyah ndeu. Vih neix, gou lumj hozhawq dungxiek nei, bae doeg sojmiz saw gohbuj gvendaengz yijcou fuengmienh henz ndang gou haenx. Gyanghwnz seizhah, gou cungj gyaez buen aen eij he daengz gyanghongh, naengh gwnzde yawj ndaundeiq gwnzmbwn. Gwnzmbwn gvangqhumhum neix bu rim ndaundeiq, lumj cuenqsig nei rongh- migmig, youh lumj aenaen najriu nei, cingq heuh gou byaij gyawj gyoengqde, bae dingq gij mimiz gyoengqde. Ngiengx gyaeuj yawj ndaundeiq gwnz- mbwn, baenz aen baenz aen vwndiz ngeizvaeg youq ndawsim gou nyoenxdoengh, ndaw yijcou miz baenzlai singhhi caengz rox, doenghgij singhgiuz gwnzde miz vunz lwi? Danghnaeuz miz gyoengqde gwn gijmaz? Yienghde maj ndaej baenzlawz yiengh? Gangj gijmaz vah ne? Gou roengz gietsim, majhung le itdingh bae damqra、fatyienh gyoengqde, gej ok gij maez caengz gej ok haenx.

Gou gyaez guh haujlai doxgaiq, ceiq gyaez dwg lienh sij suhfaz. Gaxgonq gou doiq lienh sij cih di ndeu cungj mbouj yinx, baez naengh couh naengh baenz byonghngoenz, sij ndaej fwngz naet bae, miz maz ndei lo? Hoeng riengz dwk cih gou sij haenx ngoenz beij ngoenz ndeiyawj, gou gamjsouh daengz lienh cih daiq hawj gou bienqvaq gig hung. Seizneix mbouj yungh daxmeh coi, gou moix ngoenz cungj gag cawjdoengh lienh suhfaz buenq diemj cung doxhwnj bw!

Gij vaihcawq ceiq hung gou couh dwg geiq gyaeuj lumz rieng, hwnj sam nienzgaep lo, daehsaw lij sousib mbouj ndei, mbouj dwg laeuh yienghneix couh dwg laeuh yienghhaenx. Laeuh gobwnj, vunz ndaw ranz deng soengq daengz hagdangz hawj gou; laeuh bit, gou deng ciq doengzhag yungh; hoeng baezgonq gou lumz cozyez youq ndaw bouqgwn- haeux, danghnaeuz mbouj dwg lauxbanj simndei bang gou sou hwnjdaeuj, cengdi couh nguh saeh lo.

Daxmeh cungj daezsingj gou nyinhcaen di, sijsaeq di. Gou seizneix cingq roengzrengz gaij gij vaihcawq geiq gyaeuj lumz rieng gou bae. Gou siengsaenq gou itdingh guh ndaej daengz! Gyayouz!

(Denhcinh Si Suigingj Siujyoz sam nienz- gaep Cangh Cinhcoz)