De, dawz ngaemxgingq, byoem dinj ndaemndwt, gokbak cungj daiq miz di riu ndeu, gig lumj boux gyausou daihhag. De couh dwg yijvwnz lauxsae Vangz lauxsae gyoengqdou.

Miz baez ndeu hwnjdangz, Vangz lauxsae cingq gangjgoq. Mwhde, gou itcig cazyawj duz roeglaej rog cueng. “Yingz Dung, hoenz mwngz dwg mbouj dwg deng duz roeglaej daiq hwnj gwnz diendangz bae lone?” Vangz lauxsae sawqmwh heuh gou, sawj gou wngqfouq mbouj gib, gou itseiz fanjying mbouj gvaqdaeuj, gipmuengz naeuz: “Dwg.” Gyoengq doengzhag cungj riuhaha lo. Gou hoizsaenz gvaqdaeuj, najmong dwk ngaem gyaeuj roengzdaeuj. Vangz lauxsae youh naeuz: “Gyo’ndaej gou boux sien neix rag mwngz dauqma lo.” Ndaw ban youh dwg sing riuhaha. Daj neix hwnj, gou geiq youq aen hit neix lo, mwh hwnjdangz caiq mbouj faensim lo.

Vangz lauxsae dwg boux lauxsae rox gangjriu、sonsaw miz banhfap ndeu. Mwh gangjgoq, Vangz lauxsae cungj dawz govwnz “buq” ok, gyahwnj gangjvah mizyinx, hawj dou dingq haeujmaez bae. Vangz lauxsae couh lumj boux vunzvixloh ndeu, daiq dou byaij haeuj aen biengz gvangqlangh he bae.

(Hoznanz Ho’gyah Yen Fungz- cangh Cin Cizvangz Siujyoz Yingz Dung)