Youq aen cin doenghduh gyaeundei ndeu, youq miz sam boux baengzyoux daegbied ndei. Gyoengqde dwg duz meuz Vahvah、duz ma Bijlah caeuq duz mou Nizgwz.

Miz ngoenz ndeu, Vahvah bae ranz Nizgwz guhcaemz. De yawjraen bakdou ranz Nizgwz doi rim nyapnyaj, couh daezsingj Nizgwz, heuh Nizgwz ganjvaiq daeh nyapnyaj daengz camhnyapnyaj ndaw ndoeng- faex bae. Hoeng, duz mou Nizgwz gij binghgik de youh fat lo, de yiemz camhnyapnyaj ndaw ndoeng- faex gyae lai, yienghneix couh laeglemx raix nyapnyaj roengz dah iq bae. Couh yienghneix, miz baez daih’it le, couh miz baez daihngeih, dah iq baenz camhnyapnyaj Nizgwz lo! Mbangj doenghduz ndaw cin hix hag Nizgwz yiengh- neix……

Ngoenzsinghgiz, Vahvah bae henz dah epbya. De byaij dwk byaij dwk, gyae’gyae couh mup daengz raq heiq- haeu ndeu. Daengz henz dah baez yawj, ya! Ndaw dah miz haujlai nyapnyaj fatmwt fathaeu, haujlai bya cungj dai lo, fouz youq naj raemx. Vahvah ganjgip bae cam Bijlah, Bijlah ngeiz dwg Nizgwz dawz nyapnyaj raix roengz dah bae.

Song boux de ngauz singj Nizgwz cingq youq ndaw ranz ninz haenx, cam: “Nyapnyaj ndaw dah dwg mbouj dwg mwngz raix?”

Nizgwz daekeiq naeuz: “Dwg ha, camhnyap- nyaj ndaw ndoengfaex saedcaih gyae lai lo. Aen banhfap gou ndei ba? Baezlaeng sou hix gaej bae camhnyapnyaj raix nyapnyaj lo, cigsoh raix roengz dah bae ndaej lo.”

Vahvah hozndat naeuz: “Ndei mbouj ndei, mwngz riengz dou bae henz dah yawjyawj couh rox lo!”

Nizgwz ngeizvaeg dwk riengz Vahvah caeuq Bijlah daeujdaengz henz dah. Heiqhaeu cienz daeuj, Nizgwz ganjgip goemq aen ndaeng, naeuz: “Baenzlawz baenzneix haeu ha?” Vahvah daengxda de mbat ndeu, naeuz: “Yawjyawj gij saehndei mwngz guh neix!”

Nizgwz yawj nyapnyaj caeuq bya dai fouz gwnz dah haenx, najmong lo, de gipmuengz buet ma ranz, dawz daeuj hongdawz, cingleix nyapnyaj lo. Vahvah caeuq Bijlah hix daeuj bang de. Cingleix sat nyapnyaj, Nizgwz uet hanh gwnz naj, naeuz: “Gou yaek ngoenzngoenz souj youq gizneix, mboujneix bouxwnq youh raix nyapnyaj roengz dah bae.”

Vahvah naemjnaemj le, naeuz: “Dou lij dwg guh aen baiz ndeu, baek youq henz dah, daezsingj gyoengqde.” Gangj sat, sam boux baengzyoux ndei baenbied guh hwnjdaeuj.

Daj neix hwnj, caiq hix mbouj miz doenghduz daeuj henzdah raix nyapnyaj lo, daihgya cungj dawz nyapnyaj daeh haeuj camhnyapnyaj bae. Dah iq doeklaeng hoizfuk gij yiengh gaxgonq, raemx sawndikndik, byalwg youq ndaw dah angqfwngfwng youz bae youz dauq.

Cincangj duz yiengz Danghmuj youq gwnz daihhoih cungjgez nienzdaej daengx cin fat ciengj “naengzsouj iq henhoh vanz- ging” hawj Vahvah、Bijlah caeuq Nizgwz, gyoengqde mbouj rox geijlai angq ha!

(Ganhsuz Swngj Denhsuij Si Dunghvei Yen Vwnzmiugaih Siuj- yoz ngeih nienzgaep Liuz Yizyenz)