Gou gyaez makbingzgoj nding’yanyan, makgaivaiz henjrwgrwg, hoeng mak gou ceiq gyaez haenx dwg mak- loengzfeiz.

Makloengzfeiz maj ndaej gig daegbied. Aende daengx ndang nding’yanyan, baihrog maj rim mbaw heu lumj gaiqlinx nei, gyae’gyae yawj bae, lumj bog feiz dawzyubyub nei, haeuj gyawj yawj, youh lumj aen valup yaek hai nei.

Noh makloengzfeiz miz saekhau caeuq saekgyaemq song cungj. Gou maij gwn saekgyaemq.

Aeu cax daeuj buq makloengzfeiz baenz song mbiengj, noh mak couh sikhaek loh okdaeuj, feih hong cingdamh hix coemj haeuj ndaeng daeuj. Mwngz yawj, gwnz noh mak lij miz ceh ndaem iq lumj lwgraz nei deihyaenyaen. Ngah lai lo, gou ganjgip aeu geng daeuj vat gwn. Va! Noh mak vansubsub, ceh ndaem byoiqbedbed, caen hawj vunz gwn le lij siengj gwn!

Makloengzfeiz yingzyangj gig lai, ndaej gemj biz、nyinh saej, youh ndaej bouj diet, ceh makloengzfeiz lij ndaej coi dungxsaej siuswg ne.

Makloengzfeiz dwg mak gou ceiq maij haenx.

(Gyanghsuh Swngj Nanzgingh Si Nanzswh Fucungh Sinhcwngz Siujyoz seiq nienzgaep Liuz Denhloz)