Daxmeh naeuz: “Hoenzfeiz dwg sing duz roeg youq gwnz go faexyiz bakdou ranz daxbuz heuh haenx.” Daxboh naeuz: “Hoenzfeiz dwg dujva hai dingj ranz daxbuz haenx.” Gou naeuz: “Hoenzfeiz dwg gaeq haen、ma raeuq caeuq sing riu gyoengq doengz- doih.”

Vahsug naeuz: “Ndaem gva ndaej gva, ndaem duh ndaej duh”, yienghneix ndaem hoenzfeiz ndaej mbouj ndaej hoenzfeiz ne? Gou caen siengj ndaem cungj hoenzfeiz ndeu, aenvih hoenzfeiz guhcingq sam daih vunz ranz gou majhung. Daxgoeng dwg youq maqmuengh hoenzfeiz lajde majhung, daxboh dwg youq hoenzfeiz heux lajde majhung, gou dwg youq hoenzfeiz cimyawj lajde majhung. Geiq ndaej geij bi gonq, moix bi ndwencieng dou cungj ma ranz daxbuz gvaqcieng. Ranz daxbuz youq aen mbanj bien’gyae ndeu, dwg ranz- bingzfuengz, baez daengz seizdoeng couh gig nit, cij ndaej baengh coemh feiz daeuj byoqfeiz. Ndaw cauq coemh feiz le, conghheuq couh hwnj hoenzfeiz baenz geu baenz geu, youq gyae’gyae couh yawj ndaej raen. Mwh cawj haeux, engq dwg hoenzfeiz mbinneuneu. Gou gyaez yawj hoenz- feiz, de mbaeumbeng youh miz rengz, menhmenh mbin bae gizgyae.

Hoenzfeiz gyanghaet daegbied ndeiyawj, buenx dwk gaeq haen、ma raeuq menhmenh mbin hwnj gwnz- mbwn bae, lumj gaiqmae yiuhrumz nei, seiz raen seiz mbouj raen, cix baenzlawz cungj mbouj gat. Langh miz rumz ci gvaq, hoenzfeiz couh diuqbeiz ndonj hwnj gwnzmbwn o’ngaungau bae, caeuq fwjhau guhcaemz diuqfoux. Hoenzfeiz banngaiz dwg ceiq cwxcaih, mbouj vaiq mbouj menh. Saek de damhdamh, lamzlamz, youq dingj ranz、geh faex ndaw mbanj sanq ok, lumj aen loq longz baengzsa mbang- mbit nei. Hoenzfeiz vaiqhaemh dwg aen cung cinjseiz ndeu, daengz seizgan couh mbin hwnj gyangmbwn bae, heuh lwgnyez guhcaemz baeg le ma ranz gwn caeuz. Danghnaeuz seizde doek fwnmoenq, fwnmoenq couh sawj hoenzfeiz bienq ndaej engq unq lo, ndwn youq ndaw mbanj deng hoenzfeiz humx haenx, couh lumj youq ndaw diegsien nei. Mwhde, daengx aen mbanj youq laj hoenzfeiz mbinneuneu, yienhndaej yienghde hozswnh caemdingh.

Hoeng riengz dwk gwndaenj ngoenz beij ngoenz ndei, aen mbanj ranz daxbuz ciemhciemh mbouj miz vunz yungh cauq seizgaeuq, hoenzfeiz cingq baez di baez di siusaet, saedceij caemdingh hix baez di baez di siusaet lo.

Gou siengj ndaem ok hoenzfeiz mbinneuneu, yienzhaeuh soengq hawj haujlai haujlai vunz. Soengq hawj daxbuz geu ndeu gonq, hoenzfeiz mbinneuneu, vih de vix diuzloh ma ranz; caiq soengq geu ndeu hawj Cangh daxheiz ranznden, hoenzfeiz mbaeumbeng ingj ok ndangngaeuz gaenxgyaek de; lij soengq hawj Lij daxgoeng mbanjnden, hawj boux canghsei neix daezhawj di loh- naemj…… Gou lij soengq hawj hauj- lai haujlai vunz, hawj daihgya caiq- baez yawjraen hoenzfeiz swng hwnj- daeuj.

Dangyienz, gou ceiq siengj ndaem cungj hoenzfeiz ndeu soengq hawj lajmbanj, dawz gij caemdingh haeuj gyoengqde haenx boiz hawj gyoengqde……

(Neimungzguj Swcigih Ciz- fungh Si Linzsih Yen Daihngeih Siujyoz roek nienzgaep Vei Laiz)