Ranz gou ciengx duz meuz hau ndeu, de daengx ndang hausag, yungzyubyub, mwh de gutgungq, couh lumj aen giuznae ndeu, dwggyaez dangqmaz. Gou ging- ciengz caeuq de guhcaemz, ndigah dou couh baenz baengzyoux ndei lo.

Ngoenz ndeu banngaiz, mwh gou yietnaiq, gou baez nyeux gyaeuj, duzmeuz sawqmwh ndwn youq henz gou, hawj gou doeksaet yat! Gou couh geizheih lo, haxbaenh de mingzmingz lij youq giz gyae, baenzlawz fwt couh buet daengz baihnaj gou lone? Neix couh yinxhwnj gou geizheih lo, gietdingh bae damqcaz mbat ndeu!

Gou yaengyaeng umj hwnj duz meuz, siujsim biengj gaiq nyauj de, yi! Ndaw nyauj miz haujlai noh din youh na youh unq, rib raeh de ndaej seizbienh iet rwt, vanzlij mwh byaij loh rib de mbouj bungq dieg.

Gvaq geij ngoenz gou fouzeiq yawjraen duzmeuz youq ndawhongh gaeb roeglaej, de ndang gungj da daengx, fwt yat mbat ndeu couh gaeb dawz roeglaej! Gou nyaenx mbouj ndaej bekfwngz hwnjdaeuj, ak lai lo, yawjdaeuj de byaij loh caen mbouj miz sing!

Yienghneix, gou couh bae ndaw sawgohbuj ra dapanq. Hwhw, caen ngamj, ndaw saw miz bien faenzcieng daezmoeg dwg 《MeuzVihmaz Byaij Loh Mbouj Miz Sing》 dahraix, ndaw saw sij naeuz: “Aenvih nohdemh gwnz din duz meuz mboujdanh ndaej sawj duz meuz daj giz sang yat coh baihlaj miz cozyung gemjmbaeu de daemj dieg daiq rengz, lij ndaej sawj de mwh byaij loh mbouj ok sing. Yienghneix ndaej engq ndei depgyawj duzde yaek gaeb haenx, mbouj hawj duzde fatyienh.” Laxlawz dwg gij goenglauz nohdemh ha!

Duz meuz caen coengmingz, gou dauqdaej rox duz meuz vihmaz byaij loh mbouj miz sing lo!

(seiq nienzgaep Cangh Swjhanz)