Youq ndaw ndoeng- faex gyaeundei, miz hauj- lai doenghduz iq dwggyaez youq.

Miz ngoenz ndeu, lwgmui okbae youzbyaij, sawqmwh yawjraen go faex hung he laemx roengz vang youq gyang loh, hawj gyoengq doenghduz mbouj miz banhfap gvaq loh, lwgmui sikhaek buet gvaqbae, dawz go faex de buen daengz henz loh bae. Mwhde, song lwgdouq byaij gvaqdaeuj, cingq yaek byaij gvaqbae, lwgmui ganjgip doiq songde naeuz: “Sou yawj, dwg gou dawz faex buen daengz henz loh bw.” Lwgdouq riu naeuz: “Gyo’mbaiq lwgmui, danghnaeuz mbouj dwg mwngz, dou couh mbouj miz banhfap gvaq loh lo!” Lwgmui gaeugaeu gyaeuj, ndawsim gig rimhoz. Sam duz lwgyiengz byaij gvaqdaeuj, lwgmui youh naeuz: “Lwgyiengz, sou ndei, haxbaenh go faex hung neix laemx youq gyang loh, dwg gou dawz faex buen daengz henz loh, mboujmiz sou couh byaij gvaqbae mbouj ndaej lo!” Gyoengq yiengz lienzlienz biujsi gyo’mbaiq, naeuz: “Lwgmui mwngz caen ak, dou lawh gyoengq doenghduz gyo’mbaiq mwngz!” Lwgmui dingq le, roxnyinh swhgeij ak raixcaix, daekeiq vauvau riu lo.

De laebdaeb byaij baenaj, sawqmwh yawjraen baengzyoux ndei lwgvaiz de, lwgvaiz yawjraen gwnz giuzfaex iq miz aen congh ndeu, yienghneix couh dawz hongdawz daeuj nyinhnyinh caencaen coih aen giuz. Mbouj geij nanz, giuzfaex couh coih ndei lo, aen naj lwgvaiz riunyumnyum. Mwhde, gyoengq doenghduz daj gwnz giuzfaex byaij gvaqdaeuj, naeuz: “Yi, dwg bouxlawz coih ndei aen giuz lone?” Lwgvaiz youq henz mbouj ok sing. Lwgmui dauqdaej nyaenx mbouj youq lo, buet gvaqbae cam lwgvaiz: “Mwngz vihmaz mbouj caeuq gyoengqde naeuz dwg mwngz coih ndei aen giuz ne?” Lwgvaiz giemhaw naeuz: “Nanzdauh guh saehndei le couh itdingh gangj okdaeuj ha?” Lwgmui dingq le, naj ndingfwdfwd, najmong dwk ngaem gyaeuj roengzdaeuj lo.

Daj baezneix hwnj, lwgmui caeuq lwgvaiz ityiengh, guh saehndei le mbouj caiq dauqcawq gangj, hoeng gyoengq doenghduz iq ndaw ndoengfaex cungj rox, doenghgij saehndei neix itdingh dwg songde guh!

(Denhcinh Si Hungzgyauz Gih Sizyen Siujyoz sam nienzgaep Vangz Yihih)