Aen naj hoengzmaeq luenz- lu, lwgda danfungh saeqraez, aen bak hung laj aen ndaeng iq miz di doed de daegbied yinx vunz cimyawj, neix couh dwg doengz- hag gou—— Luz Yijsenh. Cijaeu de hai aen singhoz de, mwngz couh dingq ndaej nyi singgo ndei dingq de, yienghneix, dou cungj heuh de guh “roegvenz”

Gangj hwnj “roegvenz” Luz Yijsenh, caen dwg byaij daengz gizlawz ciengq daengz gizde. Gyanghaet, byaij youq ndaw hagdangz, de riengz yinhyoz ndaw gvangjbo ciengq hwnj go《Gyanghaet Hagdangz》; mwh roengzdangz, de riengz《Daih Loqsiengjgya》itmienh ciengq itmienh diuq, yinxndaej dou hix caeuq de doxcaez ciengq diuq; mwh banringz doegsaw, de gaem bonj saw ndeu, ndaw bak hix cungj singmbaeu damz geij coenz, neix couh dwg ciengqdoeg ndei dingq dou…… Aenvih miz de seizseiz gizgiz buenxciengq, saedceij ndaw hagdangz dou miz sing miz saek!

Miz baez ndeu hagdangz hai vanjvei, riengz dwk yinhyoz rwenzrwz yiengj hwnj, dahsien ndang daenj vunjgizbauz, ndaw fwngz gang aen liengjbaengz yaenq va aeuj ndeu, menhmenh byaij daeuj. “Gyanghnanz ndaej sou ngaeux, mbawngaeux mbaw dam mbaw……” Singgo rwenzrwz sikhaek sawj gyoengq doengzhag haeujmaez lo, dou lumj ndwn youq ndaw gyang nazngaeux, ngonzyawj baenz duj baenz duj va’ngaeux maeq, Luz Yijsenh couh vaq baenz dahsau gyangh- nanz ndeu naengh ruz gvaq- daeuj…… Singgo de seiz he mbaeu, mbaeu ndaej sawj dou mbouj gamj diemheiq; seiz he menh, menh ndaej sawj dou laep da caem youq ndawde. De mbaeu ciengq menh damz, dawz gij unqswnh dahsau gyanghnanz cungj yienh okdaeuj caez; de youh sing sang ciengq dwk, dawz gij gikcingz dou coemh dawz, riengz de doxcaez youh ciengq youh diuq!

Neix couh dwg doengzhag “roegvenz” dou—— Luz Yijsenh, danghnaeuz mwngz siengj dingq singgo ndei dingq de, couh daeuj ban dou dingq- dingq ba!

(Gyanghsuh Swngj Nanzdungh Si Haij- mwnz Gih Dunghcouh Siujyoz haj nienzgaep Sih Haucwngz)