Ngoezneix mbwn gvengq ronghcingx, gou angq- fwdfwd bae hagdangz. Hwnj dangz goq daih’it, lauxsae cix doiq dou naeuz dangz neix raeuz daeuj guhcaemz, gyoengq doengzhag dingq le bouxboux angq hemqvauvau: “Ndei lai lo, ngamq haihag dangz daih’it gingqyienz dwg dangz guhcaemz.” Cungj guhcaemz neix dwg yienghneix: Danghnaeuz lauxsae naeuz “naengh”, mwngz couh itdingh “ndwn”; danghnaeuz lauxsae naeuz iet “fwngzswix”, mwngz couh ndaej iet “fwngzgvaz”. Gyoengq doengzhag rox gij eiqsei lauxsae le, couh hainduj guhcaemz lo.

Boux doengzhag hwnj daiz byaujyenj daih’it, naj gyaengjgywt, yawj hwnjbae gig gaenjcieng. Lauxsae naeuz:“Naengh!” De gingqyienz naengh roengzdaeuj dahraix, baihlaj lumj youz ndat ndaw gu deng raemx sinz nei, daihgya cungj riuhaha, boux doengzhag guh loek le naj nding’yanyan, mbouj eiqseiq buet roengz daiz daeuj. Ciep roengzdaeuj, gyoengq doengzhag laebdaeb hwnj daiz byaujyenj, gij ciusoq lauxsae yied ok yied gaumingz: Sing “mbouj bae diengzhaex” ndeu, song boux doengzhag vatvet buet haeuj diengzhaex bae; sing “okdaeuj ba” ndeu, song boux doengzhag okdaeuj lo. Hahaha! Haeuj hongx lo. Daihgya riu dwk mwngz dak gou gungj. Laebdaeb guhcaemz, lauxsae naeuz “mbouj doxmoeb”, doeklaeng Lij Denhciengz caeuq Bwz Yizmingz lumj song duz lingz nei, gaeu ngwz nyauj naj, vid gen vid ga, “moeb” youq doxcaez. Daengz gou hwnj daiz lo, gou saenqsim cibcuk, cungj guhcaemz genjdanh neix, doiq gou daeuj gangj heih lai lo. Doeklaeng cungj dwg gou liuh mbouj daengz, lauxsae ngamq roengzlingh sing ndeu gou couh baih roengzdaeuj lo. Ai, caen saetnaj.

Mbouj rox mbouj nyinh, dangz goq neix youq ndaw singriu angqyangz gietsat lo, cungj guhcaemz neix mizyinx lai lo!

(Hoznanz Swngj Gaihfungh Si Wswh Fusiuj sam nienzgaep Lu Yinhanz)