Ranz daxbuz youq Sanhsih Lanzyen, Lanzyen dwg aen singz iq gyaeundei gwnz gauhyenz namhhenj ndeu. Aenvih diegyouq gyang gauhyenz, moix baez ma ranz daxbuz gvaqcieng, daj Daiyenz roengz gauhdez le, lij yaek naengh heiqci 5 aen lai cung cij daengz. Mbwn nitsisi, heiqci youq gwnz loh heux bya raih doxhwnj, yawj ok rog cueng, miengj he dwg datbya sangvid, miengj he dwg luegbya laeglwd, sim gou gaenj ndaej yaek diuq okdaeuj lo.

Bi’gvaq, goengloh gauhsuz doeng daengz ranz daxbuz lo. Bineix engq dwg gwnz man dem va, ranz daxbuz doeng hujci lo! Daxgux naeuz ngoenz doeng hujci haenx, cawx fei hujci vunz lai vunz daih, mbouj dwg vih naengh ci, cij dwg vih louz mbaw fei he guh geiqniemh. Mbanjranz lizsij mbouj doeng hujci dauqdaej satbyai lo!

Gij bienqvaq mbanjranz dwg mbwn fan deih boek, laeuz sang caeuq heiqci yied daeuj yied lai, mbouj dan daxgux haeuj laeuz moq youq, couh lienz daxbuz betcib lai bi hix yungh hwnj soujgih cinaengz lo, lij caeuq gou sibinz doengvah ne.

Daegbied dwg gij vamaenzdoengzlingz mbouj haeuj da haenx, gingqyienz baenz ciubaiz mbanjranz ceiq lwenqda ceiq gyaeundei de. Binaengz bet nyied, dwg mwh vamaenz- doengzlingz youq ndaw doengh ndaw reih hai ndaej ceiq ndeiyawj, mbouj dwg hai baenz caz, baenz nyup, dwg hai baenz haijva. Raq rumz ci daeuj, baenz duj baenz duj saekmaeq、saekaeuj、saekhau vamaenzdoengzlingz, youq mbaw- maenzdoengzlingz heuloeg dak baihlaj, lumj langhva ndaw haij foekfan, lumj ndaundeiq gwnzmbwn yubyab, engq lumj dahndiq youq ndaw doengh guhcaemz, mbouj suk mbouj souj youq laj mbwnlamz ngauznged. Danghnaeuz mwngz caijsoq ndei yawjraen haijva maenz- doengzlingz ndaw fwnmoenq, fwn unqnem iemq miz va hom caeuq namh hom, itdingh sawj mwngz fiz bae. Vunz youq ndaw haijva byaij, va youq ndaw sim vunz hai, cungj roxnyinh neix hawj vunz gig vuenyungz, gig muemxcuk, gig gyaeundei.

Maenzdoengzlingz dwg daegcanj mbanj- ranz, yienznaeuz mbanjranz gaenq biek gij bi’ndwen gungzhoj baengh maenzdoengzlingz daeuj dienz imq aenduengx haenx bae lo, hoeng doenghgij maenzdoengzlingz gig bingzciengz neix, youq ndaw fwngz vunz mbanjranz bienqbaenz gak cungj gak yiengh gijgwn ndei gwn. Gyaujswj suijcingh、ceiznaengj、ceizdaem、mienhliengz、faenjliengz…… Yinx daeuj boux- hek daengx guek gak dieg daeuj cimzgwnz. Danghnaeuz mwngz byaij youq gwnz gai geh hongh ndaw mbanjranz, mwngz lij ndaej ngonzyawj daengz betsien gvaq haij、Sunh- vugungh、Cuhbetgaiq、Gyanghdaigungh epbya daengj lwgvunz aeu maenzdoengzlingz daeuj guj baenz haenx, gijneix cungj hawj mwngz yawj ndaej dava bae, sawj mwngz mbouj sijndaej dauqma.

Mbanjranz gou riengz yamqdin guekcoj byaij baenaj, cingq fatseng bienqvaq ngoenz ndei gvaq ngoenz. Mbanjranz dwggyaez gou, gou geijlai siengj ciengq diuz go haenh mwngz ha!

(Liuzningz Swngj Bwnjhih Si Mingz- sanh Gih Lienzfungh Siujyoz haj nienzgaep Suh Ningz)