Miz ngoenz ndeu, daxboh daxmeh caeuxcaeux couh okbae banh saeh lo, gou sij sat cozyez le, sawqmwh siengj hwnj lauxsae ciengzseiz naeuz aeu bang vunzhung guh di saeh. Gou guh gijmaz ndei ne?

Mwhde, laj laeuz cienz daeuj sing boh’au hemq: “Sou huqrwix ——” Gou sawqmwh siengj hwnj geij ngoenz gonq daxmeh sousib ndaw ranz, dawz haujlai bauqceij gaeuq doi youq gwnz yangzdaiz. Deng ha! Neix mbouj cingq dwg baez gihvei ndei ndeu ha? Yienghneix gou buet daengz henz cueng hemq boh’au. Gvaq yaep ndeu, boh’au daeujdaengz bakdou ranz gou, gou cam de: “Bauqceij gaeuq gaen geijlai cienz?” Boh’au itmienh caengh itmienh naeuz: “Seiq gak haj faen gaen ndeu, mwngz gijneix itgungh roek gaen.”

Gou siengj: Boh’au dwg mbouj dwg yawj gou dwg lwgnyez yaeuh gou ne? Gou geiq ndaej daxmeh daiq gou bae haw cawx byaek, cungj caeuq vunz gangjgyaq, ngoenzneix gou hix gangjgangj gyaq. Gou doiq boh’au naeuz: “Seiq gak haj faen daiq bengz luba, mwngz dawz riengsoq cawz bae, seiq gak gaen ndeu ndaej lwi?”“Ndaej, seiq gak couh seiq gak!” Boh’au han ndaej gig sangj, ndenq cienz hawj gou, gipgip muengznuengz roengz laeuz bae lo.

Banngaiz, daxboh daxmeh dauqma lo, gou angqvauvau dawz gienh saeh neix gonqgonq laenglaeng gangj hawj gyoengqde dingq, caj gyoengqde haenh gou. Byawz rox, gyoengqde dingq gou gangj le, cungj riuhaha, hawj gou geizheih raixcaix. Daxmeh lwnh gou: “Gou cawx byaek gangjgyaq dwg aenvih gou dwg bouxcawx, mwngz gai bauqceij gaeuq, mwngz dwg bouxgai, bouxgai baenzlawz ndaej gangjgyaq ne? Baezlaeng guh gijmaz saeh, cungj yaek doenghdoengh uk cij ndaej ha!”

Laxlawz, gangjgyaq hix yaek doengh- doengh uk bw!

(Denhcinh Si Yiyangz Meizgyanghvanh Gozci Yozyau sam nienzgaep Hanz Fazmingz)