Raemxrij sawndik yawj ndaej raen daejraemx de laecoco, youq fwjhaemh dak baihlaj yubyab ok ronghhenj, doenghgij rinraiz iq sanq youq ndaw raemx de, engq hawj raemxrij dem cungj gyaeundei daegbied he.

Gou gungj hwet roengzdaeuj, gip hwnj nyeuq rin’gyaeq luenzlu raeuzrwd he sijsaeq yawj: Najrin hausag raeuzmig lumj nyawh, baihgwnz miz song gvaengz raiz saekhoengzmaeq saeqsed, lumjbaenz diuz maesei gyaeundei he. Gou deng cungj swhyienz gyaeu neix doeksaet lo, seizbienh gip hwnj nyeuq rin he cungj baenzneix gyaeundei, nanzgvaiq diuzrij miz aen coh ndeidingq he heuh “rijrinraiz”. Henzrwz, mbouj seiz cienz daeuj sing raemx lae yiengj dingdung caeuq sing bouxyouz haenh de……

Gou siujsim yupyup dawz nyeuq rin neix cuengq haeuj daeh’aemq bae, lauheiq de doek roengz deng vaih. Rumz iq ci aen naj gou, hix ci dwk aen sim angqyangz gou. Ngamq byaij bae geij yamq, gou youh nyaenx mbouj ndaej maeuq roengzdaeuj, dawz fwngz iet roengz ndaw raemxrij liengzsi bae, vax aeu nyeuq rin ronghcingx ndeu. Nyeuq rin ronghcingx raeuzmig, youq laj ndit ronghmigmig gig ndeiyawj.

Gou couh yienghneix byaijbyaij dingzdingz, rin iq saek rongh yiengh lai lumj beng dawz gaiq din gou nei, hawj gou cungj byaij bae naj mbouj ndaej. Moix nyeuq rin cungj miz daegdiemj de, moix nyeuq rin cungj hawj gou sij mbouj ndaej, gou maqmuengh gip aeu gij rin neix liux daeuj boenzloengh. Rin couh yienghneix baenz nyeuq baenz nyeuq cuengq haeuj ndaw daeh’aemq gou bae. Ndaw daeh bonjlaiz cij miz geij nyeuq rin, mwh byaij roen seiz mbouj seiz ndaejnyi sing rin doxbungq, gig ndeidingq, hoeng seizneix aendaeh cix naek ndaej at dwk gou yamq mbouj ok din. Gou geij baez siengj dawz mbangj rin he okdaeuj, hoeng fwngz baez bungq rin, lumh daengz naj rin raeuzrwd, couh sikhaek yut fwngz dauqma.

Daengngoenz raeujrub dak dwk daihdeih, gou hanh lae hanh roenx, baegfofo naiqnuknuk, gou saeg naengh roengz lajdeih, gig mbouj cingznyienh hai aendaeh—— vut nyeuq lawz bae ndei ne? Nyeuq neix ba, mbouj ndaej, saekheuloeg cij miz nyeuq neix; lij dwg nyeuq neix ba, hix mbouj ndaej, nyeuq neix dwg saekhenj bw! Gou itseiz roengz mbouj ndaej gietsim, simgip ngiengxgyaeuj hwnj, da yawj baihnaj, daxmeh lumjbaenz mbouj yawjraen gou dingz roengzdaeuj, yied byaij yied gyae, roen baihnaj lij gig gyae ne!

Gou nyaeuq bwnda, haebhaeb heuj, doeklaeng lij dwg dawz rin raix okdaeuj, cij louz song nyeuq gou hainduj gip aeu haenx. Yietbaeg yaep ndeu, gou ndwn hwnjdaeuj bae gyaep daxmeh……

Aendaeh sikhaek bienq ndaej mbaeumbeng- mbeng, rumz liengz daj henz rwz gou ci gvaq, gou lumj bienqbaenz duz roeg ndeu swyouz cwxcaih youq gwnzmbwn mbin bae mbin dauq, simcingz sawqmwh ndei raeuh. Dwg ha, aemq mbouj ndaej, couh cuengq roengz mbangj ba, baihnaj lij miz funghgingj engq ndei. Gij gyaeundei rijrinraiz gaenq louz youq ndawsim gou, vihmaz mbouj louz roengz gij rin gyaeundei neix hawj engqlai vunz ngonzyawj ne!

(Sanhdungh Swngj Cinanz Si Ginghvuj Lu Siujyoz roek nienzgaep Liuz Swhhanz)