Daeggo seizhah byaij bae lo, daxgoeng seizcou daeuj daengz lo. Ndaw suenmak, baenz aen baenz aen mak gwnz gomak lumj baenz aen baenz aen doengloengz iq, cienz ok feih mak homfwdfwd. Seizcou daeuj le, gomegmax riu ndaej naj ndingyanyan, gohaeux angq ndaej hwet gungj lo. Rumzcou cififi, mbawfaex loenqbyoegbyoeg, laj gofaex, doek roengz fwngim daeuj. Ndaw doenghnaz, gyoengqvunz cingq nyaengq dwk, gvej aeu haeuxgwn henjrwgrwg.

Gyangmbwn vaiqhaemh, baenz baiz baenz baiz duznyanh mbe fwed mbinfiengfieng. Ndithaemh dak aenhuz, naj huz lumj aen gingq henjgim nei. Daengngoengz doek roengz baihsae bae le, duzroeg mbin haeuj rongz bae lo. Youq gwnzgai banhaemh moengzloengz neix, dwg gingjsaek vunz ci byaij youq gwnz- gai, caen ndei ha!

(sam nienzgaep Linz Yenlingz)